Kuvendi do të votojë sot lidhur me zgjatjen e afateve të Komisioneve të Vetting me të paktën dy vite. Partia Socialiste e Kryeministrit Edi Rama ka 74 vota në Kuvend dhe bashkë me 3 deputetët e PSD të Tom Doshit arrijnë në 77, ndërkohë që miratimi i ndryshimit Kushtetues kërkon së paku 94 vota.
Kjo do të thotë Rama e ka të pamundur për të miratuar ndryshimin Kushtetues, nëse deputetët e opozitës nuk do t´i votojnë pro. Dhe Ramës i duhen të paktën 17 vota nga opozita, nëse nga Grupi i tij Parlamentar nuk do të ketë mungesë.
Deputetët e LSI dhe ata që përfshihen në Kommisionin e Rithemelimit pritet ose të votojnë kundër ose të mos marrin pjesë në votim, ndërkohë që deputetët e rreshtuar në krah të Lulzim Bashës pohojnë se deri mëngjesin e së enjtes nuk ka pasur asnjë udhëzim apo vendim politik se si duhet votuar.
Me shumë gjasa votimi do të konsiderohet individual, çka do të thotë se rrjedhja e mundshme e votave që do ti duhen Ramës për të miratuar ndryshimin Kushtetues mund të realizohet.
Në mes të tetorit grupi parlamentar i PS mori vendimin për të depozituar në Kuvend nismën e firmosur nga më shumë 1/5 e anëtarëve të Kuvendit për të filluar ndryshimin e kushtetutës për ti hapur rrugë zgjatjes së KPK dhe Komisionerëve Publik, duke e shtyrë procesin e vetingut deri më 31,12,2024. Duke shtuar pra 30 muaj të tjera.
E vënë nën trysni të fortë të qeverisë dhe të diplomatëve të akredituar në Tiranë, duket se opozita e drejtuar nga Lulzim Basha, do të shërbejë si një patericë për zgjatjen e afateve të Komisioneve të Vetting, me të njëjtët emra, të cilët në jo pak raste janë akuzuar dhe sulmuar nga të njëjtët ligjvënës që sot mund të ngrenë kartonat pro tyre.
