Një vend në gjysmëfinale të Kupës, Partizani e mori edhe falë paraqitjes shumë pozitive të Alban Hoxhës.
Portieri dhe kapiteni i të kuqve deklaroi se kjo ndeshje do ta ndihmojë ekipin dhe mund të shërbejë si pike kthese edhe në kampionat.
“Besoj se i kemi lënë pas krahëve ndeshjet e kaluara. Ekipi po bën shumë mirë në ndeshjet e kampionatit dhe të Kupës. Shpresoj të jetë një pikë kthesë për ne. Kupa apo kampionati? Do t’i luftojmë të dyta, por unë them t’i vihemi Kupës. Me pak ndeshje arrin në finale. Nëse arrijmë Europën nga Kupa, do të jemi më të çliruar në kampionat. Besoj se jemi në grup shumë i mirë, pa probleme, shkojmë të gjithë shumë mirë. Të rinjtë japin maksimumin kur shohin që ne të vjetrit japim maksimumin”.
Duke folur për sezonin aktual, portieri 33-vjeçar shpjegon se ka patur probleme këtë sezon sidomos në aspektin psikologjik.
“Nuk ka qenë sezon shumë i mirë për mua, për shumë arsye. Nuk mund t’i ndaj me publikun. Lojtarët kanë ulje dhe ngritje në karrierë. Rëndësi ka të mos kesh ulje të mëdha dhe të reagosh e të ngrihesh. Duhet të jesh shumë i qetë në aspektin mental, por unë nuk kam qenë shumë i qetë këtë sezon. Raportet i kam patur të mira, nuk kam prish raporte me askënd. Arsyeja është për shkak të ndeshjeve dhe rezultateve. Ishin paraqitje të dobëta dhe mungesa e rezultatit në fillim të sezonit. Kam qenë i dëmtuar dhe e vuaj ende atë dëmtim ndaj nuk kam luajtur. E pashë të arsyeshme që të mos rrezikoja duke u aktivizuar. Shorti i Kupës? Nuk kam asnjë preference, ndoshta Vllaznia ose Teuta”, deklaroi portieri i të kuqve.
