Presidenti Ilir Meta ka pritur sot në Presidencë një përfaqësi të banorëve të 5 Majit dhe Laprakës, banesat e të cilëve do të shemben nga projektet e Bashkisë së Tiranës dhe Qeverisë.
Pas takimit banorët u shprehën se Meta ka dëgjuar shqetësimet e tyre, ndërsa paralajmërojnë se mund të shkojnë drejt një greve urie.
Një prej banorëve u shpreh se askush nuk është kundër zhvillimit, por shembja e shtëpive pa dakordësi, do të hapte plagë të mëdha sociale.
“Në momentin që banorët kanë paratë në llogaritë e tyre, le të nisë çmontimi i banesave, ndryshe të mos ndërmerret asnjë veprim, dhe të mos hapen plagë sociale.
Ne do të vazhdojmë protestat, ato nuk janë ndalur, ka pasur dhe një ultimatum për grevë urie, janë gurët e fundit që ne jemi duke lëvizur. Nëse nuk do të kemi një zgjidhje, dhe atë çfarë kërkojmë, greva e urisë është akti final”, u shprehën banorët.
