Në fund të vitit 2021, ish-kryeministri Sali Berisha deklaroi në emisionin “Zonë e Lirë” se një shtet pranë Shqipërinë ka lëshuar urdhër arresti për zv/kryeministrin dhe ministrin e Rindërtimit, Arben Ahmetaj si dhe Sekretarin e Përgjithshëm të Kryeministrisë, Engjëll Agaçi.
“Ka mandat arresti nga një vend mik për Engëll Agaçin dhe Arben Ahmetajn. Nga një vend këtu pranë. Për pastrim parash. Nuk është nga INTERPOL-i. Një gjë është e sigurtë, në djegësa një strumbullar absolut është Engjëll Agaçi. Është eminenca gri e mafies shtetërore. Don Agaçio ka qenë kryesori në borxhin e ARMO-s dhe Albpetrol. Është njeriu që i besoi Rama për t’i mbyllur dosjen Lulzim Bashës. Gjeje, është në padinë e Bashës; Agaçi. Dhe Agaçi është po kaq sa Ahmetaj në aferën e djegësva. Fondi për djegësin nuk është krijuar nga lefter Koka por nga Edi Rama dhe Arben Ahmetaj”, u shpreh Berisha në ‘Zonë e Lirë’.
Deklarata e Berishës në 25 dhjetor u trajtua si një sulm politik që bëhej, në një kohë që përplasjet në rradhët e Partisë Demokratike kishin arritur kulmin.
Por në fakt duket se ish-Kryeministri ka pasur informacione, pasi sot autoritetet italiane arrestuan disa persona, mes të cilëve edhe Fabrizio Lisi, ish-gjeneral i Guardia di Finanza-s. Ai u arrestua për korrupsion.
Po kush është Fabrizio Lisi dhe çfarë lidhje ka ai me Engjëll Agaçin?
Lisi është shfaqur si një adhurues i Edi Ramës, sikundër njihet si mik i ngushtë i Sekretarit të Përgjithshëm të kryeministrit, Engjëll Agaçi. Raportohet se të dy janë fqinj në Romë, ku i kanë apartamentet në të njëjtën godinë.
“Burri i shtetit, njeriu (ish-ministri) i kulturës, piktori i vlerësuar, sportisti, kryetari i bashkisë i “buldozerëve dhe ngjyrave”, i përdori të dyja këto të fundit për të zbukuruar së pari kryeqytetin, pastaj gjithë vendin. Me veprimin e tij ai diti të interpretojë në mënyrë perfekte dhe me ndjeshmëri të madhe institucionale ndjenjat e popullit të tij, duke gjetur kështu mënyrën më të mirë për t’i thënë “faleminderit” Italisë për ndihmën dhe bujarinë që ajo kurrë nuk i ka kursyer Tokës së Shqiponjave” shkruante Lisi për Edi Ramën.
Në një shkrimi i botuar në OÇRP në Mars të vitit 2021, gazetarja Lindita Çela raportoi për rolin e Ëngjëll Agaçit në investimet e shoqatës kulturore që drejtohej nga Gjenerali në pension i Guardia di Finanza.
“Lisi dhe një anëtar i bordit i quajtur Giampaolo Polverini thanë se Agaçi rreshti së luajturi rol negociator pasi u fut në qeverinë Rama në vitin 2013. Një tjetër anëtar i bordit të fondacionit, një ish-diplomat italian me emrin Eugenio Campo, i tha OÇRP se Lisi dhe Agaçi vazhduan të mbajnë lidhje në çështjet që lidheshin me fondacionin edhe pasi Agaçi mori postin e nivelit të lartë në kryeministri. Alessandro Bernadini, që u punësua nga Lisi për të zhvilluar tokën në breg të detit shkon edhe më tej. Ai i tha OÇRP se ‘Lisi nuk bënte dot asnjë lëvizje nëse Agaçi nuk i jepte leje atij’.
Gjenerali italian i arrestua së fundmi nga autoritetet e vendit të tij ka qenë në Shqipëri në vitet e fundit, para daljes në pension, si pjesë e Gurdia di Finanza. Ishte pikërisht periudha kur vendi kanabizohej, ndërsa në raportet e Guardia Di Finanza deklarohej se mbi 98 % e parcelave me kanabis ishin shkatërruar. Dhe raportet e Guardias në atë kohë tundeshin nga Kryeministri Edi Rama, apo ministri i tij i Brendshëm, si prova më e qartë se lufta ndaj drogës kishte hyrë në një stad të ri, edhe pse pothuajse të gjitha raportimet dhe denoncimet flisnin për të kundërtën.
