Në Krujë u bë prezantimi i projektit të Muzeut Etnografik, si edhe grantit të BE për banorët dhe Bonusit të Rijetëzimit të shtëpive të vjetra, në funksion të ekonomisë familjare e turizmit.
Të pranishëm ishin kryeministri Rama si dhe ambasadori i BE-së, Luigi Soreca.
“Me anën e programit “BE për kulturën” ne do të fillojmë çeljen e propozimeve për grante zhvillimore lokale, që quhet rikrijimi i së shkuarës, ndërtimi i së ardhmes. Janë grante me shifrën totale 350 mijë euro dhe kanë për qëllim ruajtjen e kulturës. Ne do t’i japim një vëmendje të shtuar grupeve që përfshijnë gratë, të rinjtë, pakicat si dhe personat që janë më vulnerabël në Shqipëri. Ju ftoj të gjithëve që të përdorni mundësinë që ju ofrojnë këto grante”, tha Soreca.
Ambasadori Soreca shtoi se BE do të vazhdojë të punojë së bashku me Shqipërinë për çdo gjë që do të bëhet në të ardhmen. Ai theksoi dhe një herë se BE do të vazhdojë të qëndrojë në krah të Shqipërisë.
