Nga Boldnews.al
Me 36 mijë lekë të vjetra në duar, zbriti nën urën e Tabakëve në Tiranë duke u betuar para noteres se: “Do të kryej detyrën me përkushtim dhë në zbatim të ligjeve të vendit”. Kaq mjaftoi që Arta Vorpsi të vetëshpallej anëtare e Gjykatës Kushtetuese, paçka se vendi ziente nga një përplasje e fortë institucionale mes kreut të shtetit dhe Parlamentit.
Mazhoranca e donte me çdo kusht që të merrte një nga tre emrat që kreu i shtetit duhet të përzgjidhte për anëtarë të Gjykatës Kushtetuese. Çështja sa qesharake aq edhe e ndotur nga duart e politikës në pushtet u konsiderua si skandaloze edhe në oponionin e Komisionit të Venecias. Kandidatja Arta Vorpsi, pasi mori një lumë të madh kritikash, madje duke u kthyer edhe në një brumë të mirë memesh, është rikthyer përsëri.
Ajo është një nga dhjetë emrat që kanë paraqitur dokumentacionin për të zënë një vend si anëtar në Gjykatën Kushtetuese. Nuk është e vetme, pasi një tjetër që bie në sy është edhe Arta Marku, ish-kryeprokurorja e Përgjithshme e Përkohëshme, që nuk doli aq e përkohëshme. Marku u zgjodh në vitin 2018 kryeprokurore me 69 votat “magjike” të mazhorancës dhe këtë “nder” ajo nuk ua harroi kurrë socialistëve.
Marku do të mbahet mend gjatë si kryeprokurorja që jo vetëm nuk hapi qoftë edhe një dosje të vetme penale për zyrtarët e lartë, por edhe ato që gjeti i çoi drejt mbylljes. Më të bujshme ishin dosjet 339/1 dhe 184. Dosja 339/1 implikonte ish-kreun e Bashkisë Durrës Vangjush Dako në dyshime për shitblerje votash në zgjedhjet e vitit 2017, por edhe lidhje të drejtëpërdrejta me të akuzuar për vrasje dhe trafik të lëndëve narkotike. Qoftë edhe një herë të vetme Dakos nuk iu prish gjumi për tu marrë nën hetim.
Po ashtu, dosja tjetër që degdisi nga Krimet e Rënda drejt prokurorisë së Dibrës ishte ajo e shitblerjes masive të votave në zgjedhjet lokale në Dibër. Në audiopërgjimet e publikuara nga gazeta e njohur Gjermane Bild, dilnin kryeministri Edi Rama, ministrat e kohës Saimir Tahiri, Damian Gjiknuri dhe deputetët Ulsi Manja, Xhemal Qefalia dhe Pjerin Ndreu. Në komunikimet e tyre shantazhoheshin mësues që kërcënoheshin me vendin e punës ndërsa ish-Drejtori i Policisë Dibër mburrej se ishte një ushtar i Rilindjes, duke e kthyer uniformën e shtetit në kostumin sportiv të Rilindjes.
Kandidati që ka shprehur zellin më të madh pro mazhorancës do jetë i favorizuar, por “gara” është e ethshme. Gent Ibrahimi, Arta Marku dhe Arta Vorpsi janë me një korrikulum mjaft të pasur në formimin politik sa vështirë do e kenë përfaqësuesit e PS-së se cilët do të zgjedhin. Kriteret i plotësojnë të tre! Madje me “superkualifikime” duke e treguar veten më shumë se një herë që njouritë jurdike i kanë dytësore, para militantizmit politik.
