Ka nisur me debate mbledhja e sotme në Komisionin Parlamentar për Çështjet e sigurisë, ku po diskutohet në parim i projektligjit “Për trajtimin financiar të punonjësve të Shërbimit Informativ të Shtetit pas ndërprerjes së marrëdhënieve të punës” në cilësinë e komisionit përgjegjës.
Në këtë mbledhje deputetët e opozitës kanë kërkuar praninë e vetë kret të SHISH, Helidon Bendo, i cili nuk ishte i pranishëm, por kishte dërguar disa përfaqësues, me pretendimin se vetëm dje ishin lajmëruar për seancën e sotme të Komisionit.
‘Është e natyrshme që ky institucion në disa raste të veprojë në kufijtë e ligjshmërisë, nuk më duke normale që në dy mbledhje shërbimi të mos përfaqësohet nga titullari i tij’, tha deputeti demokrat Ferdinand Xhaferraj.
Ndërkohë që drejtuesi i Komisionit, Nasip Naço tha se në rast se duan me doemos praninë e drejtorit Bendo, deputetët duhet të mbledhin 7 firma dhe ta thërrasin në Komision.
“Ne kemi vendosur një rregull që dhe ministritë të përfaqësohen në nivel tituallari”, tha më tej Xhaferraj, ndërkohë që përfaqësuesja e SHISH tha se axhenda e Bendos ka qenë e ngarkuar.
“Besoj se të gjithë përfaqësuesit e SHISH janë të gatshëm që tiu japin përgjigje të gjitha pyetjeve”, tha përfaqësuesja e SHISH.
“Nuk e di se çfarë ka më të rëndësishme kreu i SHISH sesa trajtimi financiar i punonjësve të institucionit. Ne kemi pyetje direkte për titullarin, përderisa është çështje anxhende, ta shtyjmë, dhe të presim kur të vijë titullari. Kjo është një çështje që ka të bëjë dhe me vizionin e drejtimit të titullarit, kështu që e shtyjmë mbledhjen”, u shpreh nga ana tjetër Saliani.
Ndërkohë që Nasip Naço, tha se njoftimi i Bendos është bërë në kohë nga Komisioni.
“Duhet të fillojmë dhe të dëgjojmë përfaqësuesit e SHISH, meqë kemi dhe përfaqësuesin e financave, nuk besoj se është një gjë që mbaron sot”, tha Naço, duke iu hapur kështu rrugë diskutimeve.
I të njëjtit mendim me kolegët e opozitës ishte dhe deputeti Xhemal Qefalia, i cili tha se do të ishte në nderin e vetë SHISH që të përfaqësohej nga titullari.
Pavarësisht pretendimeve të palëve, Komisioni vijoi me diskutimin në parim të këtij projektligji.
