Komisioni hetimor për inceneratorët ka rinisur sot mbledhjen për shqyrtimin dhe miratimin e planit të hetimit.
Në fjalën e saj, kryetarja e Komisionit, Jorida Tabaku u shpreh se të gjithë anëtarët e komisionit kanë marrë planin e hetimit i cili fillon që ditën e nesërme dhe përfundon me 25 shkurt.
“Nesër komisioni do të bëjë një seancë për prezantimin e të gjithë dosjes së Fierit dhe anëtarë e komisionit kush ka dëshirë të shkojë të bëjë një vizitë në inceneratorin e Fierit. Në 9 shkurt bëhet prezantimi i dosjes së Elbasanit dhe më datë 11 kemi mbledhjen për inceneratorin e Tiranës. Do të bëhet një prezantim i plotë i dosjes së Tiranës dhe më pas një vizitë. Thirrja e dëshmitarëve do të bëhet me 14 shkurt-18 shkurt. Ne do të thërrasim tre grup dëshmitarësh. Pastaj me 20-23 shkurt do të kemi përsëri grupit e fundit të dëshmitarëve dhe konkluzionet do t’i paraqesim brenda datës 25 shkurt që është dhe afati i përfundimit të këtij komisioni hetimor”, u shpreh Tabaku.
Tabaku tha se dëshmitarët janë, Edi Rama, Arben Ahmetaj, Damian Gjiknuri, Erion Veliaj, Engjëll Agaçi, Shkëlqim Cani, Alqi Bllako, Edison Konomi, Emirjana Sako, Mirel Mërtiri, Arjola Kodra, Faraudin Arapi, Lorant Dusha, Arenc Myrtezani, Klodian Zoto, Stelja Gugallja, Qazim Sejdini, Bukurosh Stafa dhe përfaqësues të mediave.
Tabaku shtoi se “pjesë e dëshmitarëve është edhe Lefter Koka, i cili sot është para drejtësisë. Po ashtu kemi tre persona që janë në kërkim Stelja Gugallja, Klodian Zoto, Mirel Mërtiri, dhe u propozuat t’ua dërgojmë thirrjen administratorëve”.
Ermonela Felaj tha se “paraprakisht ne ramë dakord që plani i hetimit të vijojë në këtë mënyrë dhe kemi bërë këtë ndarje. Natyrisht ka dhe dëshmitar që për shkak të funksioneve që kryejnë nuk mund të jenë prezent në një ditë të caktuar”.
“Ne duhet të kujdesemi që thirrje t’i bëjmë në kohën e duhur dhe ti administrojmë në kohën e duhur”, tha ajo.
Felaj shtoi se kërkoi që mbledhjet të zhvillohen pas orës 13:00.
Në fund, anëtarët e komisionit me dakordësi miratuan planin e hetimit.
