Një notere është arrestuar nga Policia e Tiranës, pasi akuzohet për “shpërdorim detyre” dhe “vjedhje të kryer duke shpërdoruar detyrën”.
Në pranga përfundoi Rezarta Koçi, 40 vjeçe, pas një operacioni policor të zhvilluar nga Seksioni për Hetimin e Korrupsionit në Drejtorinë e Policisë Tiranë, në bashkëpunim me Prokurorinë e rrethit.
“Nga veprimet hetimore ka rezultuar se kjo shtetase, gjatë ushtrimit të detyrës si notere, në vitin 2021, duke shpërdoruar detyrën, ka përvetësuar në mënyrë të kundërligjshme shuma të konsiderueshme monetare nga qytetarë të ndryshëm. Vijon puna për dokumentimin e plotë të kësaj veprimtarie të kundërligjshme”, njoftoi Policia.
Në Nëntor 2021, makinës së noteres i është vendosur lëndë plasëse në makinë.
Pas ngjarjes, u bë publik një mesazh kërcënues mbërritur në profilin e saj në një rrjet social.
Sipas raportimeve mediatike, ajo është kallëzuar disa herë në polici.
Sipas CV-së së publikuar në faqen e saj në FB, Rezarta Koçi, nga viti 2005 deri në vitin 2008 ka punuar si asistente e Zv.Ministrit të Drejtësisë Eduard Halimi. Më pas pranë Avokatutës së Përgjithshme të Shtetit në periudhën 2008 – 2009, si dhe inspektore e profesioneve të lira në Drejtorinë e Inspektimit pranë Ministrisë së Drejtësisë në periudhën 2011 – 2013. Prej vitit 2013, ushtronte profesionin e noteres.
