Eneo Bitri ishte dje në kompleksin stërvitor, ku Partizani kryen përgatitjet, por nuk u stërvit me ekipin. Mbrojtësi qëndroi i veshur “civil” dhe nuk u angazhua në asnjë moment të seancës. Shkak janë problemet me mesin të shtatlartit, të cilat kanë ardhur prej ndryshimit të terrenit të fushës, nga ajo me bar natyral në terren sintetik.
Nuk dihet nëse Bitri do të mungojë në ndeshjen e ardhshme ndaj Teutës, por nëse ndodh, situata për Mehmetin nuk do të jetë aspak e lehtë. Kjo për shkak se edhe titullari tjetër në qendër të difensivës, Egzon Belica, ka probleme muskulore dhe dje u stërvit i veçuar. Damçevski sapo është kthyer dhe vështirë të jetë gati të aktivizohet direkt në lojë.
Të vetmit qendërmbrojtës plotësisht të gatshëm janë Sembene dhe Sota. Nëse situata vazhdon e njëjtë, formacioni pëson shumë ndryshime.
Edhe Stenio Zhunior është një nga të dëmtuarit te Partizani, me brazilianin, që mungoi në ndeshjen e fundit ndaj Laçit dhe është në dyshim për sfidën me Teutën, të shtunën. Gjithsesi, braziliani dje u stërvit me grupin në një pjesë të madhe të stërvitjes, por mjekët dhe stafi nuk e panë të arsyeshme që ai të merrte pjesë në lojërat e zhvilluara nga trajneri Mehmeti.
Kështu, ai u largua më parë se shokët e ekipit. Pasi la seancën, Junior nuk shkoi direkt në dhomat e zhveshjes, por u ndal të bisedojë me brazilianët e Dinamos.
