Sipas Dashamir Shehit, shkarkimi i Metës nga posti i Presidentit kur mandatit të tij po iu vjen fundit, “po bëhet për t’i thënë e treguar shqiptarëve që ne bëjmë çfarë të kemi qejf e nuk na ndalon kush”.
Në një postim në rrjetet sociale, ai shprehet se mbron institucionin e presidentit, sepse sipas tij. shteti shqiptar po degjeneron e po thërrmohet edhe në sy të botës.
“Çfarë logjike ka ta heqësh presidentin kur për 3 muaj i mbaron mandati, aq më tepër që në 3 muajt e fundit i hiqen dhe disa kompetenca. Koha fizike po i mbaron. Koha institucionale zvogëlohet. Për çfarë po bëhet gjithë ky gjest i madh? Po bëhet për t’i thënë e treguar shqiptarëve që ne bëjmë çfarë të kemi qejf e nuk na ndalon kush. Gjykoj që është e gabuar politikisht për Shqipërinë. Kam gjykuar që ka qenë e gabuar edhe marrëveshja mes Ramës dhe Berishës në 2008-tën për të reduktuar kompetencat presidenciale. Gjatë kësaj rruge ka pasur goditje ndaj presidentëve, shpeshherë të palogjikshme që e kanë dëmtuar institucionin. Presidenti, në letër, supozohet të jetë mbi palët. Por e dëgjuat si tha Rama, mund ta marrim dhe nga jashtë, si të jetë lojtar futbolli. Kjo tregon sesa poshtë e kanë zbritur rolin presidencial”, shprehet deputeti.
“Unë mbroj institucionin e presidentit sepse shteti shqiptar po degjeneron, po thërrmohet edhe në sy të botës. Ne presim hapjen e negociatat, e kur vjen puna ne kemi një shtet që as nga ana formale nuk qëndron dot më”, shton ai.
