Kreu i Kadastrës, Artan Lame, shprehet se 2022 do të jetë viti i digjitalizimit.
Në këtë kuadër, ai tha se gjatë vitit 2021, të 1,5 milion shërbimet e ofruara nga Kadastra, të jenë në format digjital.
Por, sipas Lames, tashmë mbetet fakti që pjesa dërrmuese e dokumentacionit ekzistues të Kadastrës është ende në letër.
“Në dhjetor Qeveria miratoi financimin e projektit për digjitalizimin e arkivit te Kadastrës. Bëhet fjalë për një arkiv me rreth 50 milion dokumenta që do t’i nënshtrohen këtij procesi delikat.
Nga njëra anë po bashkëpunojmë me AKSHI-n për ngritjen e të gjithë infrastrukturës së nevojshme që do të mundësojë këtë operacion.
Nga ana tjetër, ky operacion do të ketë nevojë për një trup punonjesish që do t’a realizojnë atë.Kjo bëhet me qëllim që trupa ekzistuese e punonjësve te vijojë me dhënien e shërbimeve qytetarëve pa ulur ritmin e punës”, tha Lame, duke shpjeguar procesin.
Për të realizuar digjitalizimin, pranë Kadastrës do të ngrihet Qendra Digjitale, strukturë që do të jetësojë projektin e Digjitalizimit.
Kjo qendër do të punësojë një trupë punonjësish të rinj, prej rreth 230 vetash. Bëhet fjalë kryesisht per dy kategori operatorësh:
1) Operatorët e skanimit dhe sistemimit të dokumentacionit;
2) Operatorët e digjitalizimit të kartelave.
Projekti do të zgjasë dy vjet dhe do të shërbejë dhe si shkollë për këta operatorë që, me eksperiencën që do të fitojne gjatë punës të mund të integrohen më pas në strukturat e Kadastrës.
