Dy prej të arrestuarve nga operacioni i ndërmarrë mbrëmjen e së martës në Elbasan ku u kapën 28 persona, dy prej të cilëve janë lënë në arrest shtëpie, lidhur me korrupsionin në burgje dhe futjen në vendet e vuajtjes së dënimit të sendeve të paligjshme, janë edhe Leo Osmani Delin Hajdari. Ky i fundit është dënuar për masakrën e Vlorës së ndodhur në 29 korrik 2019.
Sipas informacioneve zyrtare nga Policia e Shtetit, zyrtarët e arrestuar dhe të dënuarit, në bashkëpunim me njëri-tjetrin merrnin dhe transmetonin porosi si dhe në disa raste furnizonin me lëndë narkotike dhe sende të tjera të ndaluara, të dënuarit apo të paraburgosurit.
Por Leo Osmani dhe Delin Hajdari përpos futjes së sendeve të paligjshme në qeli, akuzohen edhe për organizim lojërash fati brenda burgut. Sipas hetimeve, dy personat dyshohet se edhe me lejen e gardianëve, organizonin lojra fati, përfshi edhe bastet në vendet ku vuanin dënimin.
“Delin Hajdari, 31 vjeç, banues në Vlorë, i cili është i ndaluar për vepër tjetër penale në Institucionin e Ekzekutimit të Vendimeve Penale Drenovë/Korçë, i dyshuar për veprën penale “Futja ose mbajtja e sendeve të ndaluara në institucionin e ekzekutimit të vendimeve me burgim” dhe “Organizimi ose ushtrimi i veprimtarive të lojrave të fatit në kundërshtim me ligjin”;
Leo Osmani, 28 vjeç, banues në Vlorë, i dënuar më parë, i cili është i ndaluar për vepër tjetër penale në Institucionin e Ekzekutimit të Vendimeve Penale Drenovë/Korçë, i dyshuar për kryerjen e veprave penale “Futja ose mbajtja e sendeve të ndaluara në institucionin e ekzekutimit të vendimeve me burgim” dhe “Organizimi ose ushtrimi i veprimtarive të lojrave të fatit në kundërshtim me ligjin” njoftoi policia.
