Çmimi i naftës në Shqipëri ka arritur 195 lekë për litër, por ministrja e Financave, Delina Ibrahimaj, shprehet se Qeveria nuk mund të ndërhyjë dot sepse tregu është i lirë. Ibrahimaj e justifikoi gjithsesi rritjen e çmimit të naftës në Shqipëri me ndikimet nga çmimet në bursë, por që pas 6 muajve të parë të këtij viti pritet që kthehet në normalitet.
“Rritjet e çmimit të naftës dhe nënprodukteve të energjisë kanë qenë subjekt i rritjeve prej muajsh, jo vetëm në Shqipëri, por rajon dhe Europë janë të ndikuara nga rritje në bursa, ne jemi në monitorim me qëllim që të bëjmë të gjtiha analizat dhe parashikojmë ndërhyrjet që mund të bëhen.
Garantoj, që ne operojmë në një ekonomie tregu të lirë dhe nuk mund të ndërhyjmë te çmimet. Pritet që këto çmime të reduktohen pas 6 mujorit të parë të këtij viti. Do të jetë kalimtare. Me të gjithë gjasat nuk do të ketë nevojë për ndërhyrje në politika, por jemi në monitorim”, tha ministrja.
E pyetur nëse Qeveria mund të ndërhyjë duke hequr taksën e naftës, Ibrahimaj tha se politikat e taksave nuk mund të ndikohen nga luhatjet momentale të çmimeve.
Gjithashtu, ajo tha se për naftëtarët e Ballshit do të ketë pagesë kalimtare.
“Gjatë vitit 2022 do të ketë një pagesë kalimtare e barabartë me pagën minimale që do i jepet listës së ish-punonjësve të rafinerisë në Ballsh.
Kjo listë, do të rishikohet me ata persona që janë të punësuar apo vetëpunësuar, apo që kanë dalë në pension. Punonjësit të drejtohen në zyrat e punës” tha ajo.
