Trajneri i njohur, Shpëtim Duro, në studion e “Sport News” në “News 24”, ka bërë analizën e Kategorisë Superiore duke u ndalur te lëvizjet që kanë bërë klubet në merkato dhe për pasojë është ndalur edhe te Partizani.
“Partizani është në një situatë shumë në lëvizje, nuk i jap dot përgjigje tani pasi ka largime të shumta e afrime, por them që afrimet që duken, janë lojtarë që kanë qenë të Partizanit apo kampionatit e janë kthyer, kanë bërë mirë. Bitri bën paraqitje shumë të mira, më pëlqen jashtë mase aktivizimi i Sotës, një nga qendërmbrojtësit që nuk u aktivizua shumë në pjesën e parë. Skuka nuk ka kosto të lartë financiare, por hyn në planet e skuadrës, ka bërë paraqitje të mira. Problemi i Kallakut është pak i veçantë se Partizani në këto momente është jashtë loje, është jashtë objektivave në kampionat. E kishim thënë që duhet të fitojë të gjitha ndeshjet që të luftojë për katërshen e parë, por me gabimet e tanishme që la pesë pikë, duhet të respektojë kampionatin. Unë nuk jam për këtë që Kallakun e merr për dy muaj, se ia përgatit skuadrës që e ka dhënë. Partizani ka vetëm një objektiv, një ndeshje me Dinamon, se nëse eliminohet deri në maj aktiviteti ka mbaruar. Ardhja e Bitrit është pozitive, dje më ka bërë përshtypje të mirë. Edhe Hadroj ka luajtur jashtëzakonisht mirë dje, luan shumë pozicione, lëvizje jo me kosto të lartë. Pashë ndryshimin me brazilianin dhe diferenca ishte e madhe. Unë nuk jam që të flas për të huaj në këtë situatë, është vetëm Denison i Dinamos i huaj që e njoh që nga Kosova, por te të tjerët nuk shoh ndonjë lojtar që bën diferencën.” – ka thënë Duro.
