Gazeta greke Kathimerini ka publikuar sot një opinion nga Stavros Tzimas me titullin Erdogan dhe fantazma e Skënderbeut, në të cilin gazetari jep këndvështrimin e tij për vizitën e Presidentit turk në Shqipëri.
“Vizita e fundit e presidentit turk Rexhep Tajip Erdogan në Shqipëri ishte ndryshe nga të tjerat në të kaluarën. Sigurisht që kryeministri shqiptar Edi Rama i bëri nderimet me tapetin e kuq, por emocionet e dikurshme munguan në mënyrë të dukshme. Populli dhe klasa politike u ndanë. Vendimi i Erdoganit për të vizituar në përvjetorin e vdekjes (më17 janar 1468) të Gjergj Kastriotit (i njohur edhe si Skënderbeu), një hero shqiptar në luftën kundër osmanëve, u pa nga shumë njerëz si një provokim.
Ndërsa Erdogan ishte në qytetin e Laçit, ku përshëndeti të kaluarën osmane të “vendit të shqiponjave”, ndërsa përuroi apartamentet e reja të financuara nga Ankaraja për shqiptarët e mbetur pa shtëpi nga tërmeti i 2019, homologu i tij Ilir Meta bëri homazhe për monumentin e Skënderbeut në qyteti i Lezhës.
Ndërkohë, ndryshe nga rastet e mëparshme, autoritetet e Tiranës zgjodhën të mos mbulonin statujën e madhe të Skënderbeut në sheshin qendror të kryeqytetit gjatë vizitës së Erdoganit.
Rama duket se e ka ngritur udhëheqësin me prirje islamike të Turqisë në një partner strategjik kyç. Mirëpo, sjellja arrogante e këtij të fundit ka nisur të bezdisë popullin shqiptar, i cili ndjen se po ndotet krenaria e tij kombëtare.
Një tjetër kërkesë e diskutueshme e Erdoganit ishte që Tirana të dorëzonte mbështetësit e FETO-s, lëvizjes Gylen të cilën ai e quan një organizatë terroriste (një emërtim që ai përdor për shumë prej kundërshtarëve të tij) me ndikim të rëndësishëm mbi popullsinë myslimane të Shqipërisë, dhe në vend të kësaj të vendoste një lidership sipas zgjedhjes së tij mbi komunitetin.
Komuniteti Mysliman e priti me mospërfillje, inaugurimin e një xhamie në Tiranë, e cila u bekua nga Erdogan. Gjatë konferencës për shtyp, Erdogan tha se marrëdhëniet dypalëshe do të varen nga suksesi i Shqipërisë për largimin e FETO-s nga vendi.
Ramës iu desh të ndërhynte për të shpëtuar dinjitetin e postit të tij, duke thënë se vendi i tij nuk ka asnjë detyrim ndaj Turqisë.
Shqiptarët mund të duan paratë e Erdoganit, por po e shohin atë të fyejë krenarinë e tyre kombëtare dhe të kërkojë të imponojë besimin e tij fetar. Unë ende nuk kam hasur në një shqiptar që ëndërron të jetojë në një republikë islamike të stilit Erdogan – kredo politike që i forti turk ka kërkuar të promovojë (përmes dogmës së Atdheut Blu) në Shqipëri dhe në pjesën tjetër të Ballkanit.
Por, përse Rama kërkon ta ankorojë vendin e tij në Turqinë e Erdoganit, pyetja mbetet e hapur për interpretim.”/SYRI.NET
