Ish-Kryeministri Sali Berisha tha se të gjithë ata që kanë qenë pjesë e PD dhe janë larguar nga kjo parti si pasojë e Lulzim Bashës janë të mirëpritur dhe kam besim se do të japin kontributin e tyre në zgjedhjet që do të zhvillohen më 6 mars.
Më specifikisht Berisha foli për Bashkinë e Shkodrës, ku sipas tij, do të ketë një angazhim edhe të Jozefina Topallit, ish-Kryetare e Kuvendit në qeverisjen e PD.
“Po, do të ketë një angazhim dhe do të japin kontributin e tyre. Ne si Komision Rithemelimi i kemi ftuar dhe jam i bindur se do të angazhohen”, tha Berisha.
Më herët ai u shpreh se kandidatët e përzgjedhur dje përmes primareve, më 6 mars do të garojnë në logon e koalicionit “Shtëpia e Lirisë”. Berisha pohoi se pjesë e koalicionit do të jetë edhe LSI.
“LSI është pjesë e këtij koalicioni dhe po shikohen modalitetet që përcakton ligji. Po negociohet për partitë e tjera. Ka një përcaktueshmëri ligjore sa parti do jenë në koalicion,” tha Berisha.
“Nuk regjistrohen me logon e LSI. Koalicioni do të quhet Shtëpia e Lirisë. Koalicioni do ketë logon e vet, gjë e cila është normale në çdo koalicion,” tha Berisha.
Gjithashtu mësohet se koalicioni do të përfshijë aleatët aktualë të Partisë Demokratike, por edhe parti të tjera, që kanë mbështetur këtë forcë politike ndër vite.
