Ish-Kryeministri Sali Berisha tha se me votën e lirë dje, u rikthye dinjiteti njerëzor. Duke komentuar procesin e primareve, Berisha tha se ky proces do të ridimensionohet dhe do të përsoset në të ardhmen, me ekspertizën më të shkëlqyer të vendeve që kanë traditën më të madhe në këtë drejtim, SHBA-të.
Berisha tha se kjo është një praktikë thellësisht demokratike, duke shtuar se miqtë e shumtë amerikanë, kanë shprehur dëshirën për të ardhur dhe për të asistuar në konsolidimin e procesit të përzgjedhjes së kandidaturave nga qytetarët shqiptarë.
“Hapi që do të bëhet do të jetë cilësor, pasi në të gjitha primaret, do të votohen njëlloj si anëtarët e PD edhe simpatizantët dhe mbështetësit tanë”, tha Berisha.
Sipas tij, PD nuk mund t´u garantojë shqiptarëve votën e lirë, nëse nuk respekton votën e lirë brenda jetës së vet politike.
“Po ndodh një ndryshim i madh, duhet ta shndërrojmë këtë energji të krijuar në energjinë e fitores së kandidatëve të përzgjedhur nga anëtarësia e PD”, tha Berisha.
