Komisioni i Rithemelimit në degën e Partisë Demokratike në Durrës po mban primaret, për të zgjedhur kandidatin që do të garojë në zgjedhjet e 6 marsit.
Procesi i votimit ka filluar pak minuta më parë dhe do të vazhdojë deri në orën 17:00.
Mësohet se anëtarët po votojnë me tesrën e PD-së dhe me kartën e ID. Në qoftë se demokratët nuk kanë emrin në listë për të votuar por posedojnë kartën e anëtarësisë ata mund të marrin pjesë në votim.
Pjesëmarrja në votim deri tani ka qenë normale, pasi pritet që të marrin pjesë rreth 2000 anëtarë të PD Durrës.
Gara zhvillohet midis urbanistit Ardian Muka dhe 28-vjeçares Silvja Gjepali.
Gjepali është prej 14 vitesh pjesë e strukturave të Partisë Demokratike në Durrës, e anëtarësuar që në vitin 2008, dhe që prej asaj kohe është angazhuar së bashku me të rinj të tjerë në fushatat elektorale për zgjedhjet vendore dhe parlamentare.
Ajo shprehet se u përfshi në këtë garë për të respektuar vullnetin e anëtarësisë dhe strukturave të partisë që e propozuan.
Sipas saj, beteja e vërtetë nuk janë këto primare, por zgjedhjet e 6 marsit për fitimin e bashkisë së Durrësit.
Deputeti Oerd Bylykbashi, i cili po monitoron procesin në Durrës, tha se kjo është hera e parë, që anëtarësia e PD po vendos vetë mbi kandidatët. “Demokratët do të shprehin vullnetin për të zgjedhur kandidatët më të mirë, 6 marsi do të jetë një betejë e madhe ku demokratët do të tregojnë një alternativë fituese”, tha Bylykbashi.
