Besnikëria është një fjalë shumë me vlerë në jetën e përditshme dhe jo vetëm. Nuk mund të bënte këtu përjashtim dhe futbolli. Një lojë që luhet falë harmonisë perfekte të aftësisë individuale dhe atë të bashkëpunimit.
Sipas një studimi të “Focus.de”, një nga arsyet përse bavarezët janë kaq të suksesshëm në atë që bëjnë është falë besnikërisë së tyre. Ndryshe nga rivalët e Dortmundit të cilët kanë treguar më pak nga kjo anë.
MYNIH – Kontrata e Tomas Mylerit është ajo ku fjala bensikëri merr kuptimin e vërtetë të saj. Ajo skandon në 2023-shin, edhe pse një rinovim tjetër do të ishte më se i pranueshëm duke parë dhe moshën e re që ka mesfushori i kombëtares gjermane.
Bashkëpunimi me kampionët pritet që të zgjatet deri në 2025-ën, dhe kjo e pranuar dhe nga vetë CEO i skuadrës së Bajernit, Oliver Kahn, pak ditë më parë.
Manuel Nojer është një tjetër lojtar që ecën në gjurmët e fjalës besnikëri. Ndryshe nga Myler, Manuel vjen nga një klub tjetër, Shalke. Që nga 2011-ta, portieri gjerman mbron portën e bavarezëve duke arritur të shpallet dhe 5 herë portieri më i mirë në botë.
“Ai mund të luajë pa frikë deri në moshën 40-vjeçare. Mjafton të shohim Bufonin”, tha Kahn në intervistën e tij, duke lënë të kuptohej se Nojer do të luajë dhe të paktën 3 sezone të tjera në Mynih.
Sipas studimit të kyrer, mesatarja që një lojar i Bajernit qëndron në klub është 56.1 muaj. Pas tyre vjen Gladbahu me 48.6 muaj. Në vendin e tretë është Borusia e Dortmundit me vetëm 32.2 muaj.
Kjo shihet dhe si një nga pikat më kryesore përse suksesi në Mynih nuk ka fund. Edhe pse me ulje-ngritje, Bajerni është prej 10 vitesh skuadra që dominon Bundesligën në kuptimin e plotë të fjalës. Për t’i thyer ata, rivalëve u mungon… besnikëria.
