Anëtarët e komisionit të vlerësimit të tenderëve tashmë para hapjes të ofertave duhet të plotësojnë formularin e deklarimit, përmes të cilit deklarojnë se nuk ndodhen në kushtet e konfliktit të interesit me kompanitë pjesëmarrëse.
Zbatimi i udhëzimit të miratuar nga Agjencia e Prokurimeve Publike prej fundit të janarit të këtij viti synon parandalimin e konfliktit të interesit në procedurat e prokurimit. Nxjerrja e udhëzimit për plotësimin e formularit të vetëdeklarimit para hapjes të ofertave përcaktohet në vendimin e ndryshuar në 2021 “Për miratimin e rregullave të prokurimeve publike” nga qeveria.
Për të shmangur konfliktin e interesit APP u bën thirrje të gjitha enteve kontraktore që fillimisht të sigurojnë një ndarje e qartë e detyrave të nëpunësve që do të përfshihen në studimin e tregut, atyre që do të përgatisin dokumentacionin dhe anëtarët që do të vlerësojnë ofertat e prokurimit. Pas emërimit të zyrtareve sipas detyrave të tyre specifike duhet të plotësojnë formularin e vetëdeklarimit në ndodhen ose jo në kushtet e konfliktit të interesit me operatorin.
Konkretisht udhëzimi përcakton se formulari i vetëdeklarimit duhet të plotësohet nga anëtarët e grupit të punës për studimin paraprak të tregut, personat përgjegjës për prokurimin, anëtarët në njësinë e prokurimit, anëtar të llogaritjes të fondit limit dhe kritereve teknike, anëtarët e komisionit të vlerësimit të ofertave si dhe anëtarët për prokurimet me vlera të ulëta.
Udhëzimi përcakton se anëtarët e vlerësimit të ofertave apo zyrtarë të tjerë me funksione në prokurime që deklarojnë se janë në konflikt interesi me operatorët pjesëmarrëse, merren menjëherë masa për zëvendësimin e tyre. Sakaq edhe nëse konstatohet se disa prej zyrtarëve të caktuar në vlerësimin e ofertave ndodhen në kushtet e interesit, e cila nuk është deklaruar në formular duhet të zëvendësohen dhe më pas të vazhdojë procesi i prokurimit.
Agjencia e Prokurimeve Publike në hartimin e udhëzimit për parandalimin e konfliktit të interesit është mbështetur në ligjin e prokurimeve të miratuar në 2020 dhe ndryshimeve që iu bënë në 2021 vendimit të këshillit të Ministrave për “Miratimin e rregullave të prokurimit publik”.
Vendimi i ndryshuar i qeverisë në nenin 73 të tij përcakton se titullari i autoritetit apo entit kontraktor duhet të sigurojë një ndarje të qartë ndërmjet detyrave të nëpunësve të përfshirë në hartimin e dokumenteve të tenderit dhe atyre të përfshirë në procesin e vlerësimit dhe të përzgjedhjes së fituesit. Në nenin 80 të vendimit të qeverisë përcaktohet se në momentin e hapjes së ofertave, zyrtarët e përfshirë në procesin e vlerësimit të ofertave nënshkruajnë një deklaratë, përmes së cilës deklarojnë se nuk ndodhen në kushtet e konfliktit të interesit me ofertuesit pjesëmarrës.
“Nëse evidentohet se një ose disa prej operatorëve ekonomikë ndodhen në kushtet e konfliktit të interesit me një ose disa prej zyrtarëve të caktuar për vlerësimin e ofertave, atëherë duhet të zëvendësohet zyrtari/zyrtarët në fjalë dhe më pas të vazhdojë procesi i prokurimit. Personi përgjegjës për prokurimin, anëtar i njësisë së prokurimit, mund të jetë i pranishëm gjatë fazës së hapjes së ofertave duke kryer funksione të karakterit ndihmës, si mbajtja e procesverbalit, sistemimi dhe ruajtja e dokumenteve”, citohet vendimi i ndryshuar.
