Nga Boldnews.al
Është i justifikuar. Vërtetë udhëtimi ishte i shkurtër në aksin Bashki-Kryesi e Kuvendit, as 700 metra larg, por Veliaj kishte “arsye të forta” që të mos merrte pjesë në Komisionin Parlamentar ku po diskutohej për prishjet e banesave në lagjen “5 Maji” në Tiranë.
Mësohet se Veliaj ka ndjerë “rëndesë” që ia bënin të “pamundur” lëvizjen. Sikurse e deklaroi para pesë ditësh ai u mburr se: “Kam bole prej hekuri dhe nuk pyes as për FIFA, UEFA, Jezus apo Muhamed”. Këtë deklaratë e bëri me përfaqësues të futbollit të Tiranës, në betejen me kreun e FSHF-së Armand Duka.
Mirëpo sot duhet të ishte në Komisionin Parlamentar, teksa u paraqitën tre përfaqësues të banorëve pa banesa, që me vendimin e Bashkisë së Tiranës iu rrënuan shtëpitë dhe mbi atë tokë të kthyer në pirgje inertesh do të ndërtohen pallate dhe qendra biznesi.
Mes përfaqësuesve të banorëve të prekur ishte edhe 78-vjeçarja Liza Marku, e cila u mor zvarrë nga Policia Bashkiake e Veliajt teksa mundohej të shpëtonte strehën që e kishte ndërtuar prej 25 vitesh.
Veliaj në fakt nuk injoroi vetëm qytetarët e gjendur mes katër rrugëve, që për të janë një “statistikë pa vlerë” por edhe deputetët e PS-së, të cilët prisnin ardhjen e tij. Gjithashtu tregoi forcën që ka, duke përbuzuar nismën parlamentare dhe dërguar në komision vetëm një shkresë që nuk jepte asnjë arsye të qenësishme për mosprezencën e tij.
Në mënyrë institucionale, në mungesë të tij mund të autorizohej një nga nënkryetarët, por edhe këtë nuk e bëri qëllimisht, për të dhënë imazhin se edhe atë deklaratë të pesë ditëve më parë, që mburrej se ishte person i fuqishëm dhe me “bolehekuri”, nuk e kishte thënë emocionalisht, por ai vertetë ashtu mendon se i ka.
Edhe brenda oazit të Rilindjes ka pakënaqësi, pasi Veliaj shpesh nuk përfill kërkesat e deputetëve për probleme apo çështje të ndryshme që dalin nga banorët e zonave ku janë zgjedhur. Veliaj u ka vëndosur traun dhe ruajtur komunikimin vetëm me Ramën.
Një nga treguesit që ai ndihet i fuqishëm është edhe konflikti me kreun e FSHF-së Armanedo Duka. Kreu i bashkisë së kryeqytetit u vetëofrua në nismën për të rrëmbyer një institucion të pavarur të cilën ai e quan si “dhoma e vetme” që nuk e kanë nën kontrollin e tyre. Me këtë deklaratë tha një të vërtetë të madhe, pasi edhe drejtësia e cila në letra duhet të ishte e pavarur mbetët një nga “dhomat” që kontrollohet nga pushteti qëndror dhe lokal.
Refuzimi për tu përballur me banorët që u shembi banesat dhe deputetët e kuvendit ishin edhe sinjali për Ramën që në Bulevardin Dëshmorët e Kombit pranë Kullës së Sahatit që po i merret fryma nga kolla e oligarkisë e ka zyrën një person me “bolehekuri”.
