Enkelejd Alibeaj, i cili është emëruar nga Lulzim Basha në disa funksione në atë që ka mbetur në partinë e Bashës, akuzoi sot ish-Kryeministrin Sali Berisha se po bashkëpunon ngushtë me Kryeministrin Edi Rama, në biznese dhe në luftën kundër PD.
Reagimi i Alibeajt ka ardhur pas akuzave të forta që Berisha artikuloi nga salla e Kuvendit, ku akuzoi Lulzim Bashën dhe Edi Ramën si të përfshirë bashkarisht në aferën e inceneratorëve, por edhe në pastrimin e parave.
“Që prej 9 shtatorit, Sali Berisha, për të hequr vëmendjen nga non grata e tij për korrupsion, ka nisur një fushatë të turpshme shpifjesh e mashtrimesh kundër lidershpit të PD. Ndërsa hedh mashtrime nga më ordineret, familjarët dhe bashkëpunëtorët e tij vazhdojnë të pasurohen duke bashkëpunuar me Edi Ramën dhe qeverinë e tij.
Edi Ramës i duhet një njeri si Sali Berisha, ish-kryeministri i vetëm në Europë i shpallur non grata për korrupsion, një njeri i izoluar nga SHBA dhe BE. Prandaj Rama i ka vënë në dispozicion gjithë makinerinë e propagandës së tij duke bashkëpunuar më së miri me të, siç ndodh dhe në këtë komunikim të kapur nga mediat ku Flamur Noka bashkërendon me Ulsi Manjën dhe Lindita Nikollen.
Nga njëra anë ndajnë pazare dhe koordinojnë luftën kundër PD, nga ana tjetër foltorexhinjte non-grata sulmojnë lidershipin e PD. Kushdo me sy në ballë e mend në kokë e kupton tashmë se në Shqipëri ka vetëm një opozitë, që është PD. Rama dhe Berisha janë njësoj. Zgjidh Ramën dhe merr edhe Berishën. Zgjidh Berishën dhe merr Ramën”, tha Alibeaj.
