Karim Benzema paguan me detyrim dëmin e shkaktuar ndaj ish shokut të tij të skuadrës në kombëtaren franceze. Më 24 nëntor, gjykata e dënoi lojtarin me një vit burg me kusht dhe 75 mijë euro gjobë për bashkëpunim në tentativë shantazhi ndaj ish-bashkëlojtarit të tij, Mathieu Valbuena.
Por sot mësohet se nga llogaria e sulmuesit të Real Madrid, janë sekuestruar nga gjykata 230 mijë euro të lojtarit francez. Kjo është shuma që Karim Benzema i detyrohej Valbuenas në kuadër të padisë civile të këtij të fundit ndaj sulmuesit dhe që nuk ishte paguar.
Duke qenë se ai nuk ka paguar në kohë 230 mijë eurot e kërkuara nga Mathieu Valbuena në bazë të padisë civile, kjo shumë u sekuestrua nëpërmjet një përmbaruesi në një llogari bankare franceze të Karim Benzema të premten më 21 janar që shkaktoi edhe një bllokim të pjesshëm të kësaj llogarie.
“Ne kërkuam një pagesë miqësore e cila nuk ndodhi kurrë, kështu që shkuam në hapin tjetër”, reagoi për AFP Me Paul-Albert Iweins, këshilltar i Mathieu Valbuena.
Mbrojtja e Benzema ka apeluar dhe kërkon një vendim përfundimtar në Apel përpara se ato para të merreshin nga llogaria e Benzema./oranews
