Sot në media u publikua një foto, sipas të cilës, deputeti Flamur Noka, i shfaqur në krah të ish-Kryeministrit Sali Berisha, komunikonte në whats app me Kryetaren e Kuvendit, Lindita Nikolla dhe ministrin e Drejtësisë, Ulsi Manja.
Pas kësaj ka reaguar Enkelejd Alibeaj, i emëruar nga Lulzi Basha si drejtues i Grupit Parlamentar demokrat, pas largimit të Alfred Rrushajt.
Në reagimin e tij, Alibeaj thotë se Sali Berisha, për të hequr vëmendjen nga non grata e tij për korrupsion, ka nisur një fushatë të turpshme shpifjesh e mashtrimesh kundër lidershpit të PD.
“Ndërsa hedh mashtrime nga më ordineret, familjarët dhe bashkëpunëtorët e tij vazhdojnë të pasurohen duke bashkëpunuar me Edi Ramën dhe qeverinë e tij.
Edi Ramës i duhet një njeri si Sali Berisha, ish-kryeministri i vetëm në Europë i shpallur non grata për korrupsion, një njeri i izoluar nga SHBA dhe BE. Prandaj Rama i ka vënë në dispozicion gjithë makinerinë e propagandës së tij duke bashkëpunuar më së miri me të, siç ndodh dhe në këtë komunikim të kapur nga mediat ku Flamur Noka bashkërendon me Ulsi Manjën dhe Lindita Nikollen.
Nga njëra anë ndajnë pazare dhe koordinojnë luftën kundër PD, nga ana tjetër foltorexhinjte non-grata sulmojnë lidershipin e PD.
Kushdo me sy në ballë e mend në kokë e kupton tashmë se në Shqipëri ka vetëm një opozitë, që është PD. Rama dhe Berisha janë njësoj. Zgjidh Ramën dhe merr edhe Berishën.
Zgjidh Berishën dhe merr Ramën!”, shprehet Alibeaj
