Deputeti Luan Baçi u shpreh sot nga salla e Kuvendit se Lulzim Basha dhe askush tjetër nuk mund të caktojë vendin se ku mund të ulen deputetët apo se kush është pjesë e një grupi parlamentar ose jo.
“Të drejtën e përjashtimit nga Grupi Parlamentar e kanë vetëm ata që na kanë sjellë në këtë sallë, pra demokratët. Nuk na e cakton dot as Basha dhe as ju, madje as ju të dy bashkë, se ku duhet të ulemi, apo nëse bëjmë pjesë ose jo në Grupin Parlamentar”, tha Baçi, duke iu drejtuar Lindita Nikollës, Kryetare e Kuvendit.
Baçi tha se tashmë duhet ti jepet fund këtyre marrëveshjeve të hapura dhe të fshehta mes Bashës dhe juve, ndërsa duhet zbatuar rregullorja e Kuvendit.
“Lulzim Basha mund të sjellë shkresa çdo ditë, mund të kërkojë që ata që si pëlqejnë të qëndrojnë në korridor, por ju si Kryetare e Kuvendit jeni e detyruar që para se të firmosni kërkesat e Bashës, të konsultoheni, të na vini në dijeni, pasi në këtë sallë Lulzim Basha është deputet”, tha Baçi.
