Tre punonjës të urbanistikës në Vlorë janë vënë nën hetim pasi akuzohen se kanë miratuar një leje ndërtimi jashtë kritereve ligjore.
Burime zyrtare nga policia lokale bënë me dije se specialistët për Hetimin e Krimeve Ekonomiko-Financiare në DVP Vlorë proceduan penalisht për veprën penale “Shpërdorimi i detyrës”, shtetasit R.H., 33 vjeç, K.M., 32 vjeç dhe S.A., 35 vjeçe, me detyrë punonjës pranë zyrës së Urbanistikës në bashkinë Vlorë.
Sipas të njëjtave burime, këta shtetas dyshohen se kanë shpërdoruar detyrën duke miratuar praktikën për dhënien e një leje ndërtimi jashtë kritereve ligjore në favor të shtetasit A.I., i cili ka vijuar ndërtimin e objektit jashtë kushteve teknike të lejes së ndërtimit.
“Në vijim të veprimeve u procedua penalisht edhe shtetasi A. I., 38 vjeç, për veprën penale ‘Ndërtimi i paligjshëm’”, njoftoi më tej policia.
