Florian Pervathi nuk ka shfaqur pendesë për vrasjen e 65-vjeçarit Lek Lekgjonaj, mesditën e së hënës në fshatin Manati të Lezhës. Megjithatë, raportohet se 17-vjeçari është në gjendje të rënduar psikologjike.
Adoleshenti nuk e ka dhënë ende dëshminë e tij para oficerëve të policisë, por mësohet se ai ka pranuar që e vrau ish-fqinjin për hakmarrje.
Kjo pasi në 2009-n vëllai i Lek Lekgjonaj, Ndue Lekgjonaj vrau me armë zjarri babain e 17-vjeçarit. E tronditur nga ngjarja, të njëjtën ditë nëna e të miturit i dha fund jetës.
4 fëmijë mbetën jetimë, 3 vëllezër dhe motra e tyre e vogël. Një tragjedi që fatkeqësisht, 13 vjet më vonë solli një tjetër humbje jete, atë të 65-vjeçarit Lek Lekgjonaj. Ky i fundit kishte shkuar për t’u marrë me punë ditën e djeshme tek shtëpia e tij e vjetër kur 17-vjeçari e qëlloi për vdekje me pistoletë.
