Arlen Hasanaj, 34 vjeç, u shoqërua mbrëmjen e sotme nga Policia e Durrësit, si autor i dyshuar i vendosjes së tritolit një natë më parë në shtëpinë e kreut të FSHF-së, Armand Duka.
Nga raportimet e para mësohet se Hasanaj është bashkëpronar në një biznes në Durrës, në të cilën ka 50% të aksioneve dhe është administrator i saj. Por ajo që duket ka çuditur policinë është fakti se autori i dyshuar është banues në të njëjtën lagje me Armand Dukën.
Bazuar te pamjet e kamerave të sigurisë që janë sekuestruar nga policia, i ndaluari ka ardhur me një ML nga Porti në drejtim të lagjes numër 4, ku ka marrë sasine e tritolit, rreth 100 gramë, dhe e ka hedhur në porten e shtëpisë së Dukes.
“Market, bar, kafe. Për punime të brendshme, thyerje, shembje, rikonstruksione të ndryshme, etj. Veprimtari në fushën e prodhimit, magazinimit dhe tregtimit të prodhimeve e ushqimeve blegtorale e bujqësore. Tregti, import duke përfshirë magazinimin dhe tregtimin me shumicë dhe me pakicë të mallrave ushqimore, industriale, elektroshtëpiake, duhanit dhe cigareve, pijeve të ndryshme alkoolike ose jo, automjeteve, makinerive e pjesëve të këmbimit për to dhe të lëndëve drusore, aksesorë të ndryshëm, etj. Veprimtari në fushën e industrisë blegtorale e ushqimore, ndërtimit dhge tregtimit, etj. Veprimtari tregtare të transportit të mallrave/produkteve të ndryshme ushqimore brenda vendit edhe për persona të tretë, me qira si dhe për llogari të tij. Transport mallrash/produkte ndërkombëtare, për persona të tretë me qira si dhe për llogari të tij”, ky është përshkrimi në QKB për kompaninë në fjalë.
Kompania në emrin e tij është regjistruar më 23.07.2020, me adresë lagjen nr 12 në Durrës.
Në identifikimin dhe kapjen e autorit te dyshuar të ngjarjes së rëndë që tronditi qytetin e Durrësit mbrëmjen e djeshme kanë ndihmuar kamerat e sigurisë, të cilat kanë kapur lëvizjet e autorit para, gjatë dhe pas vendosjes së eksplozivit.
Kamerat e sigurisë së pallatit ku jeton duket se kanë tradhëtuar personin që dyshohet se ka vendosur lëndën shpërthyese në banesën e kreut të FSHF-së Armand Dukës mbrëmjen e të Hënës në Durrës. Vendimtare për të bindur hetuesit se ai është autori, kanë qenë hyrje-daljet e tij në pallat.
