Në ambientet e Federatës Shqiptare ka nisur mbledhja e asamblesë së Shoqatës së Futbollit Tiranë ku anëtarët e kësaj shoqate do të votojnë për kryetarin e ri. Kandidatë për këtë post janë Krenar Alimehmeti dhe Eduard Prodani.
Tjetër pikë në rendin e ditës së asamblesë është edhe votimi për nxjerrjen e gjashtë delegatëve që do të kenë të drejtë vote për të zgjedhur presidentin e ri në asamblenë e 2 marsit 2022.
Sipas federatës, numri i anëtarëve në Shoqatën e Futbollit Tiranë është 41.
Mbledhja ndërkohë po zhvillohet pa praninë e medias.
Më herët, FSHF publikoi një audio-përgjim të Erion Veliajt, i cili gjatë një takimi zhvilluar dje, i kërkonte anëtarëve të shoqatës së futbollit Tirana të votonin për kryetar Eduard Prodanin në zgjedhjet e sotme.
Mes Dukës dhe kryebashkiakut Veliaj ka patur një sërë përplasjesh ditët e fundit. Veliaj deklaron se Duka ka shpërdoruar detyrën duke vjedhur fondet e sportit. Nga ana tjetër, kryetari i FSHF-së thotë se Veliaj është duke ndërhyrë me anë të shantazhit në zgjedhje e Federatës.
