Nga Boldnews.al
Ministrja e Arsimit, Evis Kushi, i ra fare shkurt. Shkollat mbyllen për tre ditë në të gjithë vendin për shkak të temperaturave të ulëta. Pa iu dridhur fare qerpiku dha këtë lajmërim dhe u rehatua në zyrën komode ku sistemi i kondicionimit të lëshon afshin e ngrohtë nga poshtë-lart. Fëmijët dridhen në bankat e shkollës, ndërsa ndonjë ngrohëse qëndron sa për të ëndërruar se po e mposhtim të ftohtin.
Bashkitë dhe vetë Ministria e Arsimit janë përgjegjëse për infrastrukturën shkollore. Problemet më të mëdha në çdo shkollë të vendit janë sistemi i ngrohjes, mbipopullimi dhe higjena. Që të trija më së paku ofrojnë sëmundje të garantuar, ku fëmijët qëndrojnë frymë më frymë nga mungesa e klasave dhe pa higjenë ku edhe uji vjen me orar të kufizuar.
Vendimi i Ministrisë së Arsimit për të mbyllur shkollat për tre ditë, më shumë ka shkaktuar panik se “kjameti” do të vijë. Lajmi po përhapet shpejt dhe tashmë ka një zgjidhje si shumë të tjera. Të thërrasim për ndihmë “Sulltanin”. Ai nuk kursehet, ai ia di hallet Pashait të propagandës. Dhuroi shtëpi dhe jo më ca kaldaja apo ngrohëse që të paktën tu heqë ftohmën fëmijëve nëpër shkolla.
Lypja faqen pa nxi, por pa gjë nuk të le. Është koha që vetë Kushi të lidhet me ministrin e arsimit Ziya Selçuk në Turqi dhe ti qajë hallin: “Abi Zija, kjamet Arnautlluk, kalorifer kazanları”. Kaq di ta thotë e në mos Abi Zija, “Sulltani” nuk do na lerë të ngrijmë në të ftohtë. Po do jetë edhe bukur në shfaqje ku vetë Kushi bashkë me Pashain do i presin në Rinas kaldajat e ngrohjes duke falenderuar me dorën në zemër vëllezërit turq që do na gjenden edhe në këto ditë të ftohta. Edhe haraçi dihet kush do të jetë. Do i kërkojnë Pashait që të sekterosin “Qafir Gylenxhenjtë” nga vendi ynë. Edhe këtë situatë Pashai di ta shmangë, evet-evet do të thotë.
U desh një i ftohtë normal, që ka kohën e tij në dimër që qeveria të urdhëronte mbylljen e shkollave. Nëse do i besonim propagandës që shfaqet, fëmijët nëpër klasa duhet të heqin xhupat e trashë, sepse do “plasin nga vapa”, të akomodohen na bankat e reja dhe dhe të ikin të lumtur në shtëpi duke shkelur në rrugët e shtruara dhe nën kujdesin e policëve bashkiake që të buzëqeshur u urojnë nxënësve mirëupafshim.
Në Tiranë Kushi dhe Lali Eri nuk lenë gardh shkolle pa i vënë syrin e kamerave, por mjaftuan ca fallxhore të hershme që “Plakat” këtë vit do vijnë më shpejt që Kushi të lëshonte kushtrimin dhe vendosur kyçin shkollave në vend. Është ftohtë rri në shtëpi, është nxehtë rri në shtëpi. Kur është pranverë dhe vjeshtë bëjmë selfi dhe mburremi për “arsimin cilësor” dhe komod. Kalorifer kazanlarin mos e harro ministre.
