Agron Gjekmarkaj u shpreh këtë të Enjte se Lulzim Basha është një burrë që nuk i dridhet qerpiku dhe i gatshëm ti dalë për zot PD-së.
Në një takim në Kurbin, deputeti demokrat u ndal te protesta e datës 8 Janar.
“Unë kam qenë në selinë e PD bashkë me kryetarin Basha, me deputeten Metalia, Hoti, zotin Piroli, me Beharin, me shumë miq të tjerë që janë këtu në përmbushje të funksioneve që ne kemi si institucione të PD. Por çfarë ndodhi? U sulmuan duke u thyer çdo kod bese, çdo kod burrërie, u sulmuam në mënyrën për të shkaktuar vëllavrasje dhe gjakderdhje. Këtë s’ja bën shqiptari-shqiptarit. Këtë s’ja bën demokrati-demokratit. Këtë e kanë bërë vetëm komunistët në historinë e Shqipërisë. Gjejeni vetë se kush është komunisti në këtë rast”, u shpreh ai.
“Unë prej pak ditësh kam patur nderin dhe kam pranuar ftesën e Lulzim Bashës, të institucioneve të tjera të partisë bashkë me nderin e madh për të qenë nënkryetar i kësaj force. Një nga arsyet që unë kam pranuar këtë është dhe data 8 Janar, sepse kam parë që Lulzim Basha është një burrë që nuk i dridhet qerpiku, që nuk ka frikë, që është i gatshëm në vetë të parë të përballet me rrezikun. Është i gatshëm në vetë të parë ti dalë për zot PD-së. Është i gatshëm të përballet me Edi Ramën. Është i gatshëm të jetë nesër kryeministër i Shqipërisë”, shtoi deputeti.
Sipas tij, nuk ka përmbyllje të tranzicionit në Shqipëri “nëse nuk bashkohemi të gjithë bashkë të nxjerrim jashtë nga kjo fazë historike personazhet e trznicionet”.
“Në këtë moment, Shqipëria duhet të jetë më pro amerikane, më properëndimore, më demokratike dhe me Partinë Demokratike në pushtet”, përfundoi Gjekmarkaj.
