Deputetët e PD në Komisionin Hetimor për Inceneratorët kanë kërkuar ndërprerjen e financimeve për to.
Jorida Tabaku, kryetare e Komisionit, tha se Kryeministri Rama u shpreh në fund të vitit bashkë me ministren Belinda Balluku se nuk mund të ndërpresin pagesat për inceneratorin e Fierit pasi sipas tyre çështjen inceneratori i Fierit do ta çojë në Arbitrazh.
“Grupi i strukturuar kriminal me në krye Ramën kanë menduar me djallëzi që të përfshijnë në kontratën e tyre me inceneratorin e Fierit nenin që kjo marrëveshje do të çohet në Arbitrazh.
Mirëpo sipas të dhënave dhe dokumenteve rezulton që Avokatura e Shtetit kur ka shprehur mendimin e saj në lidhje me kontratën në fjalë i ka sugjeruar Ministrit Koka (por edhe qeverisë) që të ndryshojë pikën në lidhje me gjykatën e Arbitrazhit.
Kontrolli i Lartë i Shtetit ka shprehur gjithashtu mendimin e tij në raportin Auditues se ministria e Mjedisit (asokohe ministër Blendi Klosi) duhet të amendonin këtë nen të kontratës pasi ishte e palogjikshme dhe e pafavorshme.
Por grupi strukturuar kriminal me në krye Ramën refuzoi që të amendonte këtë pikë të kontratës. Letra me sugjerime i është dërguar tre ministrave, kryetarit të kuvendit dhe ish drejtorit të AKM. Të gjithë këto instanca dje heshtën duke refuzuar ndryshimet”, tha Tabaku.
Ajo u shpreh se drejtuesit e një sërë institucionesh, nga Erion Veliaj, Kryebashkiak i Tiranës, ministrja Belinda Balluku dhe deri te Ceno Klosi, kreu i Tatimeve, nuk kanë depozituar në Komision dokumentacionin e kërkuar në kuadrin e hetimit parlamentar lidhur me inceneratorët.
Tabaku gjithashtu përmendi Kryebashkiakun e Kavajës që sërisht nuk ka depozituar dokumentet e kërkuara, ndërsa shtoi se Erion Veliaj nuk ka vendim të Këshillit Bashkiak lidhur me inceneratorin e Tiranës, pasi gjithçka e ka firmosur vetë.
