Nga Gjergji Koja
Më 8 janar 2022, Policia ndërhyri dhunshëm ndaj një proteste të opozitës duke mos kursyer gazin lotsjellës apo ujin me presion, ndërsa të dhunuar mbetën gra, të moshuar e fëmijë. Policia u justifikua për ndërhyrjen në territorin e selisë së PD me kërkesën e një grupi personash që ndodheshin në seli dhe që i rrezikohej jeta.
Në këtë ngjarje policia zgjodhi të mbrojë grupin e deputetëve që ishin brenda selisë, duke sulmuar një tjetër grup deputetësh dhe mbështetësit e tyre që ishin jashtë selisë, edhe pse i përkisnin të njëjtës familjeje politike.
Sot, 11 ditë pas kësaj ndërhyrjeje të dhunshme të Policisë, u pa një tjetër skenë. Ndoshta të njëjtët policë shkuan në zonën e “5 Majit” dhe dhunuan qytetarë, shtëpitë e të cilëve po sulmoheshin nga individë që nuk kishin lidhje fare me banesat e tyre.
Policia në këtë rast u bë palë jo me të zotët e shtëpisë, por me ata që sulmonin nga jashtë, pra me policët bashkiakë të Erion Veliajt dhe fadromat që rrafshuan si pa të keq dhe kthyen në gërmadha djersën e atyre fatkeqëve që deri mëngjesin e sotëm besonin te shteti ligjor, te zemërgjerësia e Edi Ramës, dhimbshuria e Erion Veliajt, apo vijat e kuqe të Lulzim Bashës.
Situata e 8 janarit dhe kjo e sotmja pothuajse janë të njëjta, të paktën në konceptin e disave që 11 ditë më parë ato demokratët që kërkonin të hynin në seli i trajtonin si pushtues të kalasë së Lulzim Bashës dhe Gazment Bardhit.
Nëse në 8 janar policia sulmoi ata që po i merrnin kalanë Lulit, sot zgjodhi të jetë palë me pushtuesin Erion Veliaj, kundër banorëve që ndodheshin në hallin e tyre në banesat që nuk i bënë dje, as para 1 viti, as fshehtas, por të paktën 20 apo 25 vite më parë, ditën për diell, në sytë edhe të qeverive qofshin të majta apo të djathta.
Banorët pohuan se praninë e policisë te 5 Maji e kishin kërkuar ata vetë për ti mbrojtur nga Veliaj. Ndoshta kanë besuar se Gledis Nano si Drejtor i Përgjithshëm, ka ndjeshmëri të lartë për të mbrojtur ato që janë brenda ndërtesave.
Të paktën kështu ndodhi me 8 janar, kur pas një sms apo kërkese, e cila u vu në zbatim në më pak se 1 minut, policia u vërsul me yxhym për të mbrojtur banorët e selisë së PD.
Por sot, Gledisit dhe policëve të tij nuk ua ndjeu hiç për banorët e shtëpive te “5 Maji”, i morën zvarrë, i shoqëruan në komisarite me një procedurë të padëgjuar më parë “intervistimi”, ndërsa shtëpitë ua rrafshoi qetësisht Lali Eri.
Mes banorëve të 5 Majit u shfaqën edhe disa deputetë që në 8 janar i kishin kërkuar ndihmë Policisë së Edi Ramës, për ti shpëtuar nga “pushtuesit” e udhëhequr nga Sali Berisha, ndërsa sot e njëjta polici ndodhej jo për të mbrojtur banorët nga dhuna e Erion Veliajt, por si aleate e tij. Në 8 janar dëgjuam shumë mesazhe ngazëllyese dhe falenderuese për policinë, e cila i kishte shpëtuar jetën nga sulmi i Berishës.
Nuk e di se çfarë mund të ndodhte nëse në ato 3 apo 5 shtëpi që u shembën do të hynin brenda këta deputetët e Bashës dhe prej andej të kërkonin ndihmë se po i rrezikohej jeta jo nga Sali Berisha dhe mbështetësit e tij, por nga Lali Eri me fadromat dhe Policinë Bashkiake.
Gjithsesi këta deputetë sot humbën shansin për të provuar se sa mund t’i shkojë në ndihmë Gledis Nano kur përballë tyre nuk ndodhet Sali Berisha, por Edi Rama dhe Erion Veliaj.
