Tetë vite burgim është vendimi i dhënë nga Apeli i Tiranës për personin që akuzohet se dhunoi djalin tre vjeçar të bashkëjetueses.
Ngjarja
Më 24 Prill 2020, rreth orës 12:00, në Spitalin e Traumës është transportuar për ndihmë mjekësore 3-vjeçari me iniciale E.H.. Është konstatuar se ai ka pasur fraktura të ndryshme dhe ka qenë në gjendje të rëndë shëndetësore. Për këto dëmtime që sipas hetimeve kanë ardhur si rrjedhojë e dhunës fizike, akuzohet bashkëjetuesi i nënës së tij, i pandehuri me iniciale A.K.
Dënimi
Në Gjykatën e Rrethit Gjyqësor Tiranë, u zhvillua gjykimi lidhur me çështjen penale me të pandehur A.K , i akuzuar për kryerjen e veprave penale të “Keqtrajtim i të miturit”. Gjykata e Rrethit Gjyqësor Tiranë, me vendimin nr. 897 datë 6 Prill 2021 ka vendosur: Deklarimin fajtor të të pandehurit A.K për kryerjen e veprës penale të “Keqtrajtim i të miturit” dhe dënimin e të pandehurit me 12 vjet burgim.
Procesi u zhvillua me gjykim të shkurtuar dhe i pandehuri u dënua përfundimisht me 8 vjet burgim.
Çështja u shqyrtua dhe në apel mbi bazën e ankimit të bërë nga i pandehuri A.K, i cili kërkoi ndryshimin e vendimit, duke ndryshuar cilësimin juridik të veprës nga “Keqtrajtim i të miturit” në atë të “Braktisje e të miturit”.
Në përfundim të gjykimit, Gjykata e Apelit Tiranë, e përbërë nga trupi gjykues me Relator Gjyqtar Ilir Toska dhe anëtar Valdete Hoxha dhe Elbana Lluri, me vendimin nr.7 datë 17 Janar 2022 vendosi lënien në fuqi të vendimit të Gjykatës së Tiranës.
