Seria A ka rindezur më shumë se kurrë luftën për titull. Sot u luajtën 2 ndeshje të rëndësishme të javës së 22-të ku Milani pati mundësi të merrte komandën në Serinë A por gaboi ndaj Spezias në “San Siro”. Një gafë e pafalshme pasi u mundën 2-1 me përmbysje përballë tifozëve.
Për miqtë ishte titullar sulmuesi shqiptar Rey Manaj dhe kuqezinjtë e nisën shumë mirë sfidën me lojë ndërsa zhbllokuan sfidën në pjesën e parë. Në 45’ Theo Hernandez humbet një penallti por aksionin tjetër vendasit gjejnë golin me Rafael Leao.
Në pjesën e dytë, Manaj u zëvendësua në minutën e 57’ me Aguedon dhe ishte ky i fundit që në 64’ arrin të bëjë të heshtë “San Siro” me golin e barazimit.
Kuqezinjtë të tronditur disi hidhen totalisht në sulm dhe në shumë raste të krijuara nuk konkretizojnë dot teksa miqtë përfitojnë me një kundërsulm vrasës në sekondat e fundit dhe me Gyassi fundosnin Milanin.
Në sfidën tjetër, Napoli dha një përgjigje të fortë pas eliminimit në Kupën e Italisë me Fiorentinën. Në transfertën me Bolognan, të kaltërit bënë shumë mirë duke fituar me rezultatin e pastër 2-0 në një ndeshje të dominuar por aspak e lehtë.
Deçiziv rezultoi meksikani Hirving Lozano i cili me një dygolësh zgjidhi ndeshjen duke i dhënë 3 pikë Spallettit.
Me këtë fitore, Napoli rikthehet sërish në luftën për titull duke qenë 4 pikë larg Interit.
