Vit i ri, trajner i ri për Partizanin. Dritan Mehmeti bëhet gati për debutimin e madh në krye të të kuqve të cilët ndryshuan trajnerin për të ndryshuar edhe sezonin pas zhgënjimeve në rezultate.
Në konferencën për shtyp për duelin ndaj Egnatias të Dielën, trajneri Mehmeti foli për emocionet e këtij debutimi por ai tha se ndihet prej kohësh i familjes ndaj dhe e ka me të lehtë përshtatjen.
“E njoh ambientin, e kam më të thjeshtë të injektoj idetë e mia. E njoh filozofinë dhe kemi ndryshuar diçka. Është e rëndësishme që skuadra të arrijë objektivin, duhet t’i marrim ndeshjet njëra pas tjetrës. Kemi ndryshuar sa i përket mentalitetit dhe entuziazmit. E rëndësishme është të ndryshojmë edhe marrëdhënien me tifozët dhe të dalim nga kjo situatë të gjithë bashkë.
Partizani duhet të futet te filozofia e saj dhe lojtarët duhet ta kuptojnë se çfarë ngjyrash përfaqësojnë. Është e rëndësishme që çdo lojtar ta meritojë këtë fanellë. Egnatian e vlerësojmë në maksimum, të gjithë meritojnë respekt. Por, ne jemi Partizani dhe shkojmë për të marrë më të mirën”.
Trajneri i ri i Partizanit foli edhe për mundësitë e afrimit me kreun ndërsa nuk dha shumë indikacione për emrat që mund te afrohen në merkato.
“Partizani duhet të jetë i përqëndruar te ndeshja e radhës dhe duhet të jemi të përgjegjshëm që të respektojmë kundërshtarin por të bëjmë më mirë se ta. Sa i përket merkatos ne punojmë në staf, jam në kontakt me drejtorin. Nuk mund të flasim për emra konkretë dhe kemi nevojë në disa pozicione dhe po punojmë të marrim lojtarët që na duhen.
Ne nuk fokusohemi te emrat, nuk flas me emra konkretë. Kur të ketë zyrtarizime, atëherë do të jemi më korrektë në këtë pjesë. Për efekt të merkatos nuk mund të jetë nesër Kallaku, ka cilësitë e duhura dhe Partizani ka nevojë për të. Por, Partizani nuk e ka bazuar lojën te një lojtar, por te forca e grupit. Të gjithë janë të rëndësishëm dhe do të bëjnë mirë” deklaroi me optimizëm Dritan Mehmeti në konferencën për shtyp.
