Gjermania ka rifutur Shqipërinë në grupin e vendeve me rrezik të lartë nga koronavirusi.
Faktin e ka njoftuar ambasada gjermane përmes një komunikimi, ku njofton edhe dokumentet që duhen për të udhëtuar drejt Gjermanisë.
Në njoftimin e ambasadës gjermane në Tiranë thuhet:
Nga dita e diel, 16 janar 2022, Shqipëria konsiderohet sërish si një vend me rrezik të lartë nga Covid19. Për hyrjen në Gjermani kjo do të thotë:
- Ju duhet të regjistroheni në faqen e internetit www.einreiseanmeldung.de para se të udhëtoni për në Gjermani.
- Gjatë regjistrimit ju duhet të ngarkoni një dëshmi shërimi nga një infeksion me Covid19 ose që jeni plotësisht të vaksinuar.
- Nëse nuk mund të paraqisni asnjërën nga këto dy dëshmi, do t’ju duhet një test i Covid19 për të hyrë në Gjermani. Megjithatë pas mbërritjes do ju duhet të karantinoheni për dhjetë ditë. Pas pesë ditësh, ju mund të testoheni përsëri dhe, nëse rezultati i testit është negativ, mund t’i jepni fund karantinës.
Informacione të mëtejshme gjenden në faqen tonë të internetit: https://tirana.diplo.de/al-de/-/2502392
