Jemi Gjana, ish-deputet dhe ish-ministër i Sali Berishës, po shfaqet si një ndër kritikët më të ashpër të ish-Kryeministrit.
Ai ka mbajtur funksionin e nënkryetarit dhe Kreut të Grupit Parlamentar të PD gjatë periudhës kur PD kaloi në opozitë në vitin 1997, ndërsa sot është shfaqur në krah të Lulzim Bashës, duke i shërbyer me devotshmëri, njëlloj si dikur Berishës, me gjetjen e armiqve brenda partisë.
Në mbledhjen e thirrur nga Lulzim Basha, ku u vendos edhe përjashtimi dhe pezullimi i anëtarëve të Komisionit Rithemelimit, Gjana ka propozuar që të gjithë anëtarët duhet të pezullohen, ndërsa mvsohet të ketë deklaruar se Berisha s’ka të ngjashëm me asnjë lider botëror në histori dhe e se njeh mirë.
Ai e ka krahasuar situatën me 1997, duke kujtuar se PD ka bërë opozitë me 17 deputetë.
“Ne e njohim atë (Berishën) mirë. Nuk ka të ngjashëm me asnjë lider botëror në histori, që t’ia bëjë këtë partisë së tij. Grupi i Rithemelimit duhet të përjashtohet i gjithë. Mbaj mend historinë e ’97-ës dhe grupi ynë mbeti me 17 deputetë. Ne bëmë opozitë dhe e mbajtëm PD-në. Shkonim në terren dhe kishim përballë bandat dhe e ngritëm partinë duke komunikuar dhe duke dëgjuar. Kjo nuk është as 1/3 e asaj që i ndodhi PD-së në 97”, është shprehur Gjana.
