Fitorja 4-1 ndaj Tërbunit, e improvizuar pas pamundësisë për të luajtur me Prishtinën, ka kënaqur trajnerin Thomas Brdariç. Ky i fundit, pas sfidës tha për gazetarët se e rëndësishme kishte qenë që të gjithë të jepnin kontributin e tyre pa probleme në këtë javë e vetëm në ditët në vijim do të mendohej më shumë për taktikën ndaj Tiranës.
“Është një ndeshje përgatitore dhe ne përgatitemi si për ndeshjet e turneut. Në ditët e fundit kemi pasur ngarkesa të forta dhe për mua ishte gjë e madhe që mbijetuam javën e parë. Ishim në gjendje të shënonim dhe tani duam të shkojmë në javën tjetër në nivelin tjetër.
Prishtina? E dimë që jetojmë në pandemi dhe gjërat ndodhin të paparashikuara. Falënderoj ekipin e Tërbunit që patën mundësinë të vinin në Shkodër të luanin me ne.
Të rinjtë e Vllaznisë? E kam thënë që në fillim që çdo gjë ka nevojë për kohë. Nuk mund të kesh sukses vetëm me disa talente. Mendoj se sezoni i kaluar ishte i suksesshëm, edhe presidenti e di që ne duhet të shohim në të dy anët, për të zhvilluar talentet dhe të kemi ekip konkurrues, të jemi në gjendje të luajmë në nivele më të lartë në Superiore. Për të pasur këtë balancë, është kombinim i mirë, por duhet të punojmë në këtë aspekt.
Tirana? Mendoj se kemi një javë për këtë ndeshje të rëndësishme. Javën tjetër do të jetë një përgatitje ndryshe nga kjo e ditëve të fundit dhe padyshim të gjithë duket se presin me padurim të luajnë me Tiranën. Edhe ne do të jemi mëse të përgatitur për përballjen. Sot ishim të përqendruar më shumë që lojtarët të merrnin minuta se ndeshja tjetër do të jetë në një ambient krejt tjetër, stadium tjetër, dinamikë tjetër, tifozë.
Tirana e Partizani po bëjnë merkato? Në do i përgjigjemi me paraqitjet e lojtarëve se kemi besim te ata, besojmë se mund të jenë në një nivel të lartë”, tha Brdariç pas sfidës.
