VIDEO/ Berisha kërkon të rikthehet në selinë e PD, policia i bllokon rrugën dhe hedh gaz lotsjellës

Efektivë të policisë përdorën spraj kundër Sali Berishës dhe mbështetësve të tij, të cilët po përpiqeshin të ktheheshin në selinë e PD. Teksa po kalonin urën përballë katedrales së Shën Palit, një grup efektivësh i bllokuan rrugën dhe nuk i lejuan të kalonin.

Pas largimit të protestuesve dhe deputetëve të Partisë Demokratike nga selia, aty kanë mbërritur prokurorët e Prokurorisë së Tiranës. Grupin e kryeson kryeprokurorja e kryeqytetit, Elisabeta Imeraj.

“Ky ishte një skenar i përgatitur me kujdes gjatë këtyre ditëve. Nuk kishte njeri dhe nuk ka asnjë problem me asnjë deputet të PD, përveç se me pengun e Edi Ramës që quhet Lul “brava”. Kjo është një lëvizje e pandalshme. Kjo është një betejë që nuk d të ketë të sosur. Ju garantoj që kjo që patë sot është vetëm faqja e parë e saj. Këta janë shqiptarët e lirisë. Ata që mendojnë se do të mbahen pengje dhe kukulla për të shtypur vullnetin e tyre, gabohen rëndë. Sot shqiptarët dhe bota panë fytyrën e vërtetë të Lul pengut, i cili u mbrojt me metoda banditeske, me egërsinë e narkobanditëve të Edi Ramës”, shtoi ai.