Lorenc Panganika, kreu i Policisë së Tiranës, u shfaq sot si një militant, ndërsa komentoi përplasjet në selinë e Partisë Demokratike.
Panganika në deklaratën e tij u pozicionua kundër protestuesve, të cilët i konsideroi të dhunshëm, por nuk tha asnjë fjalë lidhur me ata persona që nga brenda selisë së PD hodhën gaz lotsjellës, një lëndë luftarake, e cila mund të përdoret vetëm me autorizim nga Policia dhe Ushtria, në situata të caktuara.
“Ju ishit të pranishëm vetë dhe e patë se lëvizjet e protestuesve ishin të dhunshme. Na erdhën kërkesa për ndihmë ku deputetët thonin se u kërcënohej jeta, prandaj edhe ne ndërhymë. Të gjithë protestuesit që kanë përdorur akte dhune do të mbajnë përgjegjësi”, tha Panganika.
Por për çështjen më thelbësore, atë të hedhjes së gazit lotsjellës ndaj protestuesve nga brenda selisë së PD, atje ku prej ditësh denoncohen me foto persona të maskuar, Panganika nuk ishte në gjendje të thoshte se cilët ishin ata persona.
“Nuk e dimë se kush e hodhi gazin, do hetohet dhe do e çojmë para përgjegjësisë”, tha Panganika.
Policia ndërhyri forcërisht ndaj protestuesve në oborrin e PD, pak sekonda pasi nga Lulzim Basha u dha një deklaratë, ku kërkohej ndihmë për të shmangur atë që Basha e konsideronte si “gjakderdhje”.
Çuditërisht policia pasi mori nën kontroll territorin, minimalisht nuk ushtroi kontroll mbi personat që ndodhedhin në seli, pra cilët janë ata dhe cilët kanë hedhur gazin ndaj protestuesve. Në një situatë përplasjeje, policia e Gledin Nanos, me urdhër të Edi Ramës dhe kërkesë të Lulzim Bashës, ndërhyri kundër vetëm njërës palë, ndërsa pala tjetër as u verifikua, edhe pse u përdorën lëndë helmuese ndaj një turme.
