Eneo Bitri është emri më i përfolur te Partizani gjatë këtyre ditëve shumë intensive në merkaton e të kuqve. Drejtuesit po nxitojnë për të përforcuar skuadrën sa më shpejt të jetë e mundur, në mënyrë që gjithçka të jetë gati për ndeshjen e parë zyrtare të vitit.
Një qendërmbrojtës është dëshira e trajnerit Mehmeti dhe Bitri shihet si zgjidhja më e mirë që ofron tregu i kësaj dritareje transferimesh.
Beratasi në fillim të këtij viti arriti të mbyllë kontratën me Astanën, ku u transferua në verë.
Gjithsesi, në tryezën e Bitrit nuk është ulur vetëm Partizani sepse gazeta ka mësuar ekskluzivisht se prej ditësh Kukësi ka nisur një propozim për lojtarin.
Burime pranë të kuqve bëjnë me dije për gazetën se Partizani së fundmi ka bërë ofertën zyrtare dhe çka është më e rëndësishmja, Bitri ka rënë dakord me të kuqtë.
Në një situatë të tillë pyetja është: Përse nuk zyrtarizohet rikthimi i tij? Kjo dilemë ka një përgjigje të thjeshtë.
Bitri ka një mundësi jashtë vendit dhe ky shans e ndalon të hedhë firmën mbi kontratën e ofruar nga Partizani. Vetëm në rast se Bitri do të firmoste me një ekip jashtë vendit, do të prishej akordi paraprak me të kuqtë.
