Mesditën e nesërme, Komisioni i Rithemelimit të PD ka paralajmëruar protestë për të nxjerrë Lulzim Bashën nga selia. Nga ana tjetër, Basha ka blinduar selinë e PD dhe nuk lejon asnjë nga mbështetësit e Sali Berishës të futen në seli.
Raportohet se Basha ditën e nesërme do jetë brenda godinës dhe do mbledhë forumet drejtuese e grupin parlamentar.
Për ditën e nesërme janë marrë dhe masa nga policia.
Raportohet se policia ka hartuar planin e masave, një pjesë e të cilave po vihen në zbatim që ditën e sotme. Janë rreth 1000 efektivë policie që pritet të angazhohen përreth gjithë zonës së PD deri te kryeministria.
Disa rrugë do të bllokohen, por nuk dihet ende se cilat akse. Policia do të jetë në gatishmëri dhe në rast incidentesh do të ketë shtim të forcave policore.
