Shembet ura e fshatit Liras në Gramsh, banorët e izoluar prej 10 ditësh

300 banorë të fshatit Liras në zonën e Gramshit kanë kërkuar ndihmën e emisionit Fiks Fare pasi prej 10 ditësh si pasojë e reshjeve të shumta është shembur ura e fshatit me të cilën lidhen me qytetin. Ata thonë se fëmijët kanë disa ditë që qëndrojnë në shtëpi sepse nuk kalojnë dot. Kjo urë është ndërtuar që në vitin 2008 dhe që në atë kohë ka pasur problemet e saj. Çdo vit shembet dhe nuk është e qëndrueshme. Bashkia vjen e riparon por përsëri shembet.

Keni kërkuar disa herë ndihmë për këtë urë, bashkia vjen hedh 2-3 kova zhavorr mbi urë dhe vijnë prurjet e Holtës, sërish një avaz. Tani nuk kemi parë asnjë nga institucionet të vijnë edhe pse jemi ankuar në bashki.

Tek kjo urë kur bie shi vjen lumi prishet ura. Ne i kemi vënë disa dërrasa dhe ngjitemi si ketri për të shkuar në qytet. Me transportin marrim një zetor e fusim në lum vendosim makinën mbi zetor ne mbi makinë dhe kalojmë përtej lumit. Nuk ka zgjidhje tjetër. Të gjithë që jemi çuna të rinj dhe kemi blerë automjete i lemë përtej urës dhe na i dëmtojnë. Vijmë natën i kontrollojmë i kemi mjetet aty apo jo.

Kryeplaku i fshatit Liras, për gazetarët e Fiks Fare tha se kjo urë ka më shumë se 10 ditë që është shembur. Telefonova me urgjencë kryetarin e bashkisë, erdhi atë ditë me urgjencë bashkë me inxhinierin dhe më thanë që të ardhurat e bashkisë nuk e mbulojnë shpenzimin e kësaj ure. Këto rregullime të urës i kemi bërë vetë dhe kjo është një zgjidhje e pasigurt dhe me rrezikshmëri për fëmijët. Ky fshat është totalisht i lënë pas dore. Nuk ka as ujë dhe as ambulancë.

Bashkë me kryeplakun e fshatit Liras gazetarët ju drejtuan bashkisë së Gramshit për të pyetur se çfarë është bërë për të parandaluar shembjen e kësaj ure. Inxhinierja e bashkisë Gramsh, Eva Ismailaj tha se kjo urë është ndërtuar në vitin 2008 dhe sipas saj bashkia Gramsh ka bërë ndërhyrje të shpeshta, por lumi Holta ka gërryer gjithmonë këmbëzat e saj.

LEXO EDHE  "Nuk jam zemra jote", Tabaku e Felaj sherr në Komisionin për Inceneratorët

Në vitin 2008 për ndërtimin e kësaj ure janë shpenzuar 9 839 552 lekë. Vetë inxhinierja thotë se momentalisht kjo bashki nuk ka mjaftueshëm fonde, dhe se për restaurimin e saj janë kërkuar edhe 3 409 949 të tjera. Banorët e fshatit thonë se me aq shpenzime të bëra ndër vite urën e mbajnë mend vetëm me dërrasa dhe me riparime herë pas here./TCH