Reperja e famshme Nicki Minaj ka mohuar pretendimet për ryshfet kundër saj dhe bashkëshortit të saj dhe thotë se ajo “asnjëherë nuk ka ofruar para në këmbim të një deklarate”, sipas All Hip Hop.
Kujtojmë se bashkëshorti i Minaj, Kenneth “Zoo” Petty është paditur nga Nicole Hough – dhe ka shmangur një vendim prej 20 milionë dollarësh së bashku me Nicki – pasi ajo pretendoi se ai dhe Minaj u përpoqën ta frikësonin atë për të heshtur për akuzat për përdhunim kundër tij nga viti 1994. Petty u dënua për tentativë përdhunimi në vitin 1995 dhe kreu katër vjet në burgun e shtetit të New York-ut.
Hough pretendoi se Nicki punësoi bashkëpunëtorë për të kontaktuar dhe për t’i ofruar asaj 500,000 dollarë për të mos rrëfyer historinë e saj. Ajo gjithashtu pretendoi se Nicki është e lidhur me një bandë.
“Gjatë telefonatës, kurrë nuk i kërkova asaj të ndryshonte historinë e saj. Asnjëherë nuk i kam ofruar para në këmbim të një deklarate dhe nuk e kam kërcënuar me asnjë lloj dëmtimi nëse do të vendoste të mos jepte një deklaratë.
Në fakt, unë i thashë se nuk doja që ajo të gënjejë për asgjë dhe të tregojë të vërtetën për atë që sapo më kishte zbuluar, vetëm nëse do të ishte rehat ta bënte këtë”– thuhet në dokumentet ligjore të siguruara nga botimi.
Minaj dhe burri i saj thuhet se janë të lidhur me bandën ‘Makk Balla Brims Blood’ të Queens. Sipas All Hip Hop, banda njihet si organizata kriminale më e rrezikshme në New York, shumë e organizuar dhe e përfshirë në raste krimi me drogë, armë dhe muzikë.
Nicki Minaj ka mohuar që ajo dhe bashkëshorti i saj janë pjesë e një bande të tillë.
