Deputetë demokratë, pjesë të Komisionit të Rithemelimit të PD kanë tentuar të hyjnë këtë Mërkurë në selinë qendrore të Partisë Demokratike, por pa sukses. Kjo pasi dyert e selinë rezultuan të kyçura.
Deputetët tentuan të hyjnë nga tre dyer, por të gjitha rezultuan të kyçura.
Si përfundim mbajtën një deklaratë në oborrin e selisë.
Flamur Noka tha se PD është kthyer në një Alkatraz modern nga Edi Rama dhe Lulzim Basha, ndërsa shtoi se në datë 8 Janar, selia do të kthehet në “shtëpinë e lirisë”.
“Një grup deputetësh dhe deputetesh anëtarë të grupit parlamentar të PD erdhëm sot në selinë e PD, në shtëpinë tonë për të zhvilluar një takim dhe një mbledhje në lidhje me axhendën që do ketë grupi parlamentar dhe PD për vitin 2022. Ajo që po konstatojmë me dhimbje është se shtëpia e lirisë, PD jonë, duhet të ishte një ambient që të gumëzhinte, një ambient festiv ku të mblidheshin të gjenin veten gjithë demokratët. Por Edi Rama e ka kthyer me pengun e tij në një Alkatraz të kohëve moderne. E patë vetë, gjithçka e mbyllur, e blinduar, si një burg i sigurisë së lartë. Kjo është e turpshme. Rama i ka krijuar kushtet e një burgu pengut të tij që ti zgjasë pushtetin. Por kurrë ai s’mund të burgosë shpitin e lirë të demokratëve. Data 8 do jetë një ditë kur demokratët do marrin frymë lirisht, jo nga qelitë e Alkatrazit, por nga shtëpia e lirisë. Në mënyrën më paqësore nga data 8 do e kthejmë në selinë e lirisë”, tha Noka.
“Mendoni se në demokraci blindi është zgjidhje?! Është vota e shumicës. Është mjeran ai që burgoset me ndihëm e Ramës”, shtoi ai.
