Franca, Italia dhe Britania në ‘ciklonin’ e Omicron! Mbi 650 mijë raste infektimi në 24 orët e fundit

Në “ciklonin” e mutacionit Omicron është edhe Kontinenti i Vjetër, që së fundmi po përjeton një shpërthim të paprecedentë të rasteve me koronavirus. Rënia e treguesve epidemiologjikë ka alarmuar stafin shëndetësor.

Franca, Britania dhe Italia po përjetojnë një përkeqësim të shpejtë të ngarkesës virale, ndërkohë që në një situatë shqetësuese janë edhe vendet iberike.

Disa qeveri evropiane kanë zgjedhur mini-bllokimin për të menaxhuar krizën, ndërsa të tjera kanë rritur fushatat e vaksinimit.

Edhe pse varianti Omicron shkakton komplikacione të lehta, që sipas disa ekspertëve përkthehet në fillimin e fundit të pandemisë, ai nuk ndalet së shkaktuari dëme në sistemet shëndetësore.

Një rekord i zi po thyen tjetrin në të gjithë botën, por në disa vende evropiane situata me shtimin e infeksioneve duket jashtë kontrollit. Goditjen më të ashpër e ka marrë Franca, vendi që ka numrin më të madh të infeksioneve ditore në të gjithë Evropën që nga fillimi i pandemisë.

Në 24 orët e fundit në Francë u regjistrua rekordi i zi, me 271.686 raste me koronavirus. Ndikimi në spitale tashmë është ndjerë, me më shumë se 2000 shtrime brenda një dite, sipas të dhënave të publikuara dje nga Santé publique France.

Rritja e rasteve të regjistruara shpjegohet pjesërisht nga një numër i paprecedentë i testeve PCR: tetë milionë javën e kaluar, sipas Veran.

Megjithatë, shpërthimi epidemiologjik është real, siç dëshmohet nga “norma e pozitivitetit”. Kapërceu 15%, afër niveleve rekord të vjeshtës 2020.

Edhe pse numri i infeksioneve është rritur, ministri francez i Shëndetësisë këmbënguli në mbrojtjen që ofron vaksina, e cila mbetet kryesisht efektive kundër formave të rënda.

LEXO EDHE  “Kur e mbytën lotët Dumën, sekretari kruante sumën”/ Bejtja e Ilir Vrenozit për protestën në PD

Rekord i zi është shënuar edhe në Britani. Për herë të parë që nga shpërthimi i pandemisë në vendin ishullor, numri i infeksioneve kaloi 200,000, duke bërë që kryeministri Boris Johnson të bëjë deklarata urgjente.

Në 24 orët e fundit në Britani janë raportuar 218.724 raste me koronavirus, ndërsa shtrimet në spital janë rritur me 42%.

“Beteja me koronavirusin nuk ka përfunduar,” tha Boris Johnson në një konferencë për shtyp nga Downing Street.

Në 24 orët e fundit në Itali janë regjistruar 170 844 raste me koronavirus dhe kanë humbur jetën 259 persona. Numri i vdekjeve është më i larti në nëntë muaj dhe i infeksioneve po ashtu që ka thyer rekorde. Ky përkeqësim është ndoshta për shkak të rritjes së kontakteve ndërpersonale për shkak të festave.

Mbreti i Suedisë Charles Gustav XVI dhe Mbretëresha Sylvia u diagnostikuan me Covid-19, njoftoi sot Pallati.

Mbreti dhe mbretëresha, të cilët janë plotësisht të vaksinuar dhe me dozën e tretë, kanë simptoma të lehta dhe po ndihen mirë duke pasur parasysh kushtet, tha Pallati në një deklaratë.

Në të njëjtën kohë, vendi shënoi një rekord të ri ditor të rasteve me Covid-19, duke regjistruar 11.507 raste më 30 dhjetor, sipas të dhënave të Shërbimit Shëndetësor të shpallur sot, pasi vala e katërt e virusit përfshin vendin dhe ushtron presion të ri mbi sistemin shëndetësor.