Disa deputetë francezë kanë thënë se janë kërcënuar për vdekje, ndërsa po diskutojnë për një certifikatë vaksinimi, që do të bllokojë nga jeta publike të pavaksinuarit.
Qeveria po kërkon të miratojë një ligj që do t’u kërkojë njerëzve të tregojnë prova të vaksinimit për të hyrë në vendet publike dhe për të përdorur transportin publik, me disa përjashtime.
Legjislacioni pritet të miratohet nëpërmjet një votimi këtë javë, ndërsa nga ana tjetër ka shkaktuar reagime të ashpra nga kundërshtarët e vaksinës.
Franca ka një nga normat më të larta të vaksinimit kundër Covid në Bashkimin Europian.
Të paktën 91% e popullsisë së rritur janë vaksinuar plotësisht, sipas qeverisë franceze .
Të dielën, 2 janar, Agnès Firmin Le Bodo nga partia e qendrës së djathtë postoi një email, ku ajo kërcënohej për vdekje, për mbështetjen e saj për certifikatën e vaksinimit kundër Covid.
“Demokracia jonë është në rrezik,” shkroi zonja Firmin Le Bodo, e cila është farmaciste dhe vaksinon njerëzit kundër Covid.
