Ai është vetëm 16 vjeç, por aktualisht po bën histori në kampionatin e moshave U-17.
Bëhet fjalë për portierin e Kombëtares U-17, Klevi Totoshi, i cili aktivizohet me Pepa U-17 në kampionat, që nuk pësoi asnjë gol në 12 javët e para të Kategorisë Superiore U-17.
Më konkretisht, Totoshi e ka mbajtur rrjetën të paprekur për 1080 minuta, duke shënuar një rekord për futbollin shqiptar dhe në kampionatet e moshave.
Vetë protagonisti përpiqet të qëndrojë me këmbë në tokë dhe thekson se merita i takon të gjithë skuadrës, teksa shton se synimi i tij është që të fitojë titullin kampion me Pepën U-17.
“Patjetër që jam i kënaqur me këtë ecuri mjaft të mirë, por unë mendoj se është puna e të gjithë ekipit, nuk është vetëm meritë e imja. Është edhe meritë e mbrojtjes dhe e gjithë djemve, që kanë bërë maksimumin. Sigurisht po të mos ishte për ato nuk do ta kishim arritur këtë rekord dhe këto rezultate. Nuk mendoj shumë për rekordin, pasi synimi im është që të shpallem kampion me Pepën dhe të fitoj trofe”, – shprehet Totoshi duke folur për Fshf.org.
Aktualisht, ai është pjesë e Kombëtares U-17 dhe është grumbulluar vazhdimisht gjatë këtij viti nga trajneri Ervin Bulku me kuqezinjtë, teksa me paraqitjet e tij ka bindur stafin teknik të jetë pjesë e përfaqësueses.
Totoshi është një nga portierët më të spikatur në grup-moshën e tij dhe paraqet një element që duhet mbajtur parasysh si një nga futbollistët e perspektivës.
